Біздің Қорғалжында талай дарындар туған. Өкініштісі, бүгінгі ұрпақтың өкілдері оларды онша білмейді. Арқа ақындарының ақиығы Құлтума, өнер тарланы Қосымжан Бабақов, Халық әртісі Рәбиға Есімжанова, қылқобыз шебері Дәулет Мықтыбаев, сазгер Кенжебек Күмісбеков, академиктер Асылхан Құрманбаев пен Сұлтанбек Қожақметов, журналистер Жомарт Әбдіхалықов, Бәдуан Имашев, Айдарбек Имажановтар сол аға толқынның өкілдері. Аудан орталығындағы мәдениет үйінің алдында Кеңес үкіметінің көсемі болған Ленин ескерткішінің орнында бүгінде композитор Кенжебек Күмісбековтің мәрмәр мүсіні тұр. Бұл өзгені «артық санап, өз туғанын кем көретін» қазекеңнің түзелгені болар!
Енді аудан басшылары халық әртісі Рәбиға апамызға да осы құрметті көрсетсе. Шын пейілмен іздесе, қаржы да табылады. Қорғалжыннан шыққан қалталы кәсіпкерлер жетерлік. Тек азаматтық, ерлік керек. Соларды ұйымдастырып, бастамашы болатын азаматтар қажет. Заман қанша қиын десек те, бәрі өткінші. Бұдан да қиын жылдарды еліміз еңсерген.
Смағұл РАХЫМБЕК,
жазушы, Қазақстанның мәдениет қайраткері.
Астана қаласы.
