Мамандығым – мақтанышым
Тараз қаласында әртүрлі жұмыс істедім. 2008 жылы Астанаға қоныс аударып, Қосшы ауылындағы «Қазына-SR» жауапкершілігі шектеулі серіктестігіне сүйікті мамандығым бойынша жұмысқа орналастым. Биыл кәсіпорында жиһаз жасау цехы ашылды. Мені бірден осы цехқа ауыстырды. Қазір шетелде жасалған станоктарда жұмыс істеп, тапсырыс бойынша үстел, парта, орындық тәрізді әртүрлі жиһаз жасаймыз.
Шетелдік технологиямен жұмыс істегендіктен болар, еңбек өнімділігі артты. Цехта отыздан астам адам жұмыс істейді. Жылына 30 мың дана жиһаз өнімдерін шығаруды межелеп отырмыз. Жасаған өнімдеріміздің еліміздің барлық өңірлерінде сатылатындығы үміт шырағын жағып, қуантады. Кәсіпорын табысты жұмыс істеуі, еңбекақымыз толымды болуы үшін еңбек өнімділігін арттыру басты назарда. Менің ойымша әркім өз ісін сүюі керек. Кәсіптің жаманы жоқ. Тек жүрек қалауымен таңдап алғаның абзал. Сонда ғана жұмысың нәтижелі болады. Мен өз мамандығымды сүйемін, жастар да өз кәсібін дұрыс таңдап, мақтан тұтса екен деймін.
Мейрамбек ҚАЗИЕВ.
Целиноград ауданы.
