Бұл туралы Орталық Коммуникациялар қызметінде өткен брифингте ҚР Ішкі істер министрлігі Төтенше жағдайлар комитетінің төрағасы Владимир Беккер мәлімдеді.
«Қазіргі уақытта Ақмола облысының Атбасар ауданында, Петропавл қаласында және Солтүстік Қазақстан облысының 8 ауданында төтенше жағдайлар режимі енгізілген. Ахуал біртіндеп тұрақталып келеді. Елді мекендерден су қайтуда. Өзендердегі су деңгейі де біршама төмендеп қалды», – деді ол өз сөзінде.
Дегенмен, оның айтуынша, Солтүстік Қазақстан мен Қостанай облыстарындағы өзендердің тасу қаупі барынша жоғары болып отыр. Ол сондай-ақ, ауа райы мәліметтерін ескере отырып, Ішкі істер министрлігінің Ақмола, Ақтөбе, Шығыс Қазақстан, Қостанай және Солтүстік Қазақстан облыстарындағы құтқарушылар топтары жедел құтқару бөлімшелері, өрт сөндіру қызметі және апаттық құтқару жұмыстары есебінен күшейтілгенін айтып өтті.
