Өңір басшысы алдымен, болашақ Неке сарайында болды. Нысанның құрылысын «Ақсәуле» жауапкершілігі шектеулі серіктестігі қолға алған. Жоба бойынша нысан құны 284 миллион теңгеге бағаланып отыр. Қазіргі кезде ғимараттың бірінші қабатының қабырғасы тұрғызылып, төбесі жабылған.
Сондай-ақ, екінші қабатының қабырғасын кірпішпен қалау және металл конструкцияларды монтаждау жұмыстары қызу қолға алынған. Құрылыс жұмыстарымен танысқан облыс әкімі Сергей Кулагин салынып жатқан нысанның келешекте қаланың ең көрікті орындарының біріне айналатынын атап өтті. Сонымен қатар, нысанды келер жылдың екінші тоқсанында барлық талаптарға сай пайдалануға беруді тапсырды.
Капцевич көшесінің бойында жүргізіліп жатқан күрделі жөндеу жұмыстарына да көңіл бөлінді. Қазіргі кезде мұнда Вавилов көшесінен бастап, теміржол көпіріне дейін 4,5 шақырым жол жөнделуде. Осы орайда, аймақ басшысы жөндеу жұмыстарын мерзімінде 5 қыркүйекке дейін аяқтауды тапсырды. Ал, «Оқжетпес» стадионында болғанында қолға алынған ағымдағы жөндеу жұмыстарына назар аудара келе, орын алған кейбір кемшіліктерді тез арада жою қажеттігін атап өтті.
Облыс әкімінің баспасөз қызметі.
