Рио-де-Жанейрода өтіп жатқан жазғы Олимпиада ойындарының алғашқы күндері де артта қалды. біреулерді қуантып, біреулерді күйіндірген тартысқа толы бұл күндерде қазақстандық спортшылар жанкүйерлерінің үмітін ақтап, қоржынға төрт медаль түсірді.
Әзірге, біздің құрама командалық есеп бойынша 30-шы орында тұр. Жарыстың төртінші күні 62 келі салмақта өнер көрсеткен қазақстандық ауыр атлетші Фархад Харки қосынды салмағы 305 келіні көтеріп, жүлделі үшінші орынды иеленді. Бұрын бұл салмақта отандық зілтеміршілердің мұндай дүбірлі жарыстарда олжа сала қоймағанын ескерсек, көңіл қуантатын жетістік. Келесі күні тағы бір ауыр атлетші қызымыз 63 келіге дейінгі салмақта сайысқа шыққан Карина Горичева қосындысы 243 келі салмақты көтеріп, қола медальді қанжығасына байлады. Естеріңізде болар, бұған дейін екі дзюдошымыз Галбадрах Отгонцэцэг пен Елдос Сметов қола және күміс медальді жеңіп алған болатын. Бұған қоса, тағы да көңілге үлкен үміт ұялатып отырған спортшыларымыздың жеңістері бар. Үш боксшымыз: 49 келілік салмақта сайысатын Біржан Жақыпов, 75 келіге дейінгі салмақтағы Жәнібек Әлімханұлы және 91 келіге дейінгі салмақта рингке шыққан Василий Левит қарсыластарын қапы қалдырып, келесі кезеңге жолдама алды. Ширек финалға шыққан бұл боксшыларымыздың командамыздың қоржынын толтыруға елеулі үлес қосар мүмкіндіктері мол екендігін бағамдауға болады. И.Дычко, Д.Елеусінов сияқты мықтыларымыз әлі рингке шыққан жоқ. Қазақстандық жанкүйерлер үлкен үміт артып отырған зілтеміршілеріміз әлем чемпионы Нижат Рахимов пен әлем чемпионатының күміс жүлдегері Жазира Жаппарқұл, аса жеңіл салмақта өнер көрсететін былғары қолғап шебері Біржан Жақыпов пен Жәнібек Әлімханұлы да жанкүйер сенімін ақтайды деген ойдамыз. Жарыстың екінші түрінен финалға шыққан жүзуден 200 метрлік қашықтықта сайысқа түсетін жерлесіміз Дмитрий Баландиннің де жүлде салар мүмкіндігі мол. Олимпиаданың әрбір күні тартысқа толы қызықты кездесулермен өтуде. Қызықты сәттерді жіберіп алмаңыздар. Жеңісті күндер жалғаса бергей!
Қалкөз ЖҮСІП.
