«Сепе-2012» серіктестігі биылғы егін орағына тамыздың аяғына қарай кіріскен болатын.
Серіктестік директоры Омархан Сахановтың айтуынша, науқанға 15 «Вектор-410» комбайны қатысуда. Мамандармен қамтамасыз ету жайы да мұнда дұрыс шешімін тапқан. Комбайн штурвалында отырғандардың дені тәжірибелі механизаторлар. Серік Қиямбеков биыл 40-ыншы егін жинау науқанын өткізіп отыр екен. Павел Кадушкин, Руслан Шаяхметов, Әкім Ғалиевтер де біраз жылдардан бері техника тізгінін ұстап келе жатқан тәжірибелі мамандар. Ал, МТЗ тракторымен науқан жұмыстарына қолғабыс беріп жүрген Валерий Фигель биыл бірінші рет науқанға қатысып отыр.
Орақ жұмыстарының үзіліссіз жүр-гізілуін қамтамасыз ету мақсатында жылжымалы қызмет көрсету қосыны құрылған. Оның құрамында реттеуші шебер Виктор Шемберг, дәнекерлеуші Андрей Лапунцев сияқты он саусағынан өнер тамған мамандар бар. Қосалқы бөлшекпен қамтамасыз ету мәселесі де толық шешімін тапқан. Атап айтқанда, «РосАгро» АҚ-ымен тікелей байланыс орнатылған.
Егіс алқабынан астықты қырманға, одан элеваторға тасымалдау жұмыстарымен айналысатын арнайы бригада құрылып, жұмыс істеуде. Осы жұмыспен тіркемелері бар 12 «КамАЗ» автокөлігі мен 2 «К-700» тракторы айналысуда. Бас аспаз Жанат Камалова мен оның көмекшілері Айдана Баяділова және Гаухар Аяшева дәмді тағамдарымен көпшіліктің көңілін тауып жүр. Астық түсімі гектарынан орта есеппен 11,5-12 центнерден айналуда. Егіннің 60 пайыздайы бастырылып, қамбаға тасып алынды.
Өмірсерік ШАЙХИН.
Атбасар ауданы.
