Сыйластық пен жарастық орнаған отбасы – қоғамның басты тірегі. Баланың әдептілігі, болашақта қандай адам болатыны үй ішінде алған тәлім-тәрбиесіне байланысты болмақшы.
«Әкеге қарап ұл өсер, шешеге қарап қыз өсер» деген даналық қағиданың түпкі мәні осы отбасы тәрбиесіне келіп тіреледі. Сондықтан, Ерейментау қаласында ел тәуелсіздігінің 25 жылдығына арналған «Мәңгілік ел – отбасы әлемі» шарасы өтті. Отбасы құндылықтарын
насихаттау мақсатында өткен сайысқа баға беретін әділқазылар алқасының құрамында «Нұр Отан» партиясы аудандық филиалы төрағасының орынбасары Сара Дүйсембаева, ішкі саясат бөлімінің басшысы Кәмила Ахмедиярова, іскер әйелдер клубының мүшесі Светлана Чернышева, «Шаңырақ» қоғамдық қоры әлеуметтік-психологиялық зерттеу орталығының директоры Берік Рақышев болды. Сайысқа әкелер мен ұл балалар, аналар мен қыз балалар бір топ болып қатысып, отбасы құндылығының алғышарттарын жарыс барысында сәтімен жеткізе білді. Сайысқа қатысушылар ән салып, би билеп өнерлерін ортаға салды.
«Әке – асқар тау» аталымы бойынша жүлделі үшінші орынды Амангелді Тоқтархан мен Жұмабек Амангелді жеңіп алса, екінші орынды Ярослав Қалиев пен Максим Қалиев иеленді. Бірінші орынды Талғат Көпенов пен Тәңірберген Қайриден олжалады. «Менің анам» сайысында Гүлзада Бөлекпаева мен Жанетта Мұқашева, «Сәнді қыздар» сайысында Лилия Яхина мен София Блоха, «Креативті қыздар» және «Шебер қыздар» байқауларында Елена Путилова, Виктория Путилова, Үміт Төлендинова және Ділназ Қыдырбаевалар жеңіс тұғырынан көрінді. Жарысқа қатысушылардың бәрі ұйымдастыру алқасының дипломдарымен және бағалы сыйлықтарымен марапатталды.
Тағылымды шараның ұйымдастырушысы әрі демеушісі «Шаңырақ» қоғамдық қоры әлеуметтік-психологиялық зерттеу орталығының директоры Берік Рақышев өнер сайысына қатысқан барлық отбасыларға береке-бірлік, татулық-тыныштық тілеп, шараға қатысқандары үшін алғысын айтты. Отбасының құндылықтарын насихаттау бағытында өткізілген шара мақсат үдесінен шықты деп айтуға негіз бар.
Гүлдана ҚАНАПИЯНОВА.
Ерейментау ауданы.
