Малотимофеевка дәрігерлік-әлеуметтік мекемесі Астанадан 25 шақырым қашықтықта орналасқан.
Іргетасы сонау 1968 жылы қаланған ғимарат 146 адамға арналған типтік үлгідегі мекеме. Мұнда осындағы қарттарға, жалғыз қалған адамдарға арнайы әлеуметтік көмек көрсетіледі. Білікті дәрігерлер адамдарға мекемеде орнатылған қазіргі заманғы құрылғылардың көмегімен сапалы медициналық қызмет көрсетеді, әрі психологиялық тұрғыдан да жәрдем жасайды.
Мұнда жұмыс істеуге лайықталған арнайы шеберханалар да бар. Онда әрбір жұмысқа ынталы жандар өздері қалаған іспен айналыса алады. Ерлер әртүрлі материалдардан сан алуан заттар, мүсіндер жасап, ғимараттың аумағын тазартуға атсалысады. Мекеме жанында 3 жылыжай бар, онда көкөністер өсіріледі.
Қамқорлыққа алынған егде немесе мүгедек адамдар спорттық жарыстарға, спартакиадаларға, конкурстарға жиі қатысады. Арнайы жаттығу залдары да бар. Көркемөнерпаздар үйірмесі де жұмыс істейді. Медициналық-әлеуметтік мекеме жөндеу жұмыстарын қажет етеді. Ең соңғы рет күрделі жөндеу жұмыстары 2001 жылы жүргізілген. Ғимараттың жылу жүйесі әбден тозған. Бұл мақсатта облыстық бюджеттен «Жұмыспен қамтудың жол картасы-2020» бағдарламасы аясында мекемені жөндеуге 200 миллион теңге бөлініп отыр. Сәуір айынан бері мекемеге Сәкен Жекебаев басшылық етіп келеді. Ол өз міндетіне кіріскеннен бері қарттар үйінің аумағы мен село маңайы абаттандырыла бастады. Ең бастысы, ойқы-шойқы болған тас жол тегістелді. Көп іс тындырылды, алайда атқарылар жұмыстар әлі де жетерлік.
Қарттар үйінде ешкім де қағажу көрмейді, көңілдерін мұң шалмайды. Өйткені, мұнда жайлы тұрмыс пен мазмұнды демалысқа барлық жағдай жасалған.
Жанат ТҮГЕЛБАЕВ.
Целиноград ауданы.
