Қазақстан Республикасының Тұңғыш Президенті күні қарсаңында мемлекет басшысының портреті бейнеленген 10 мың теңгелік қағаз ақша шығарылды.
Тәуелсіздік жылдарындағы Елбасының елге сіңірген ерен еңбегін ескеріп, осындай шешім қабылданғанын дұрыс деп санаймын. Қазақстан Республикасы Тәуелсіздігінің 25 жылдығы мерейлі мерекесі қарсаңында шығарылған 10 мың теңгелік қағаз ақша еліміздің тарихынан сыр шертеді. Оның бір бетінде Елбасының портреті, Елорданың бойтұмары саналатын «Бәйтерек» монументі, қаншама ұлт пен ұлыстың ортақ шаңырағына айналған қазақ жерінің картасы бейнеленсе, екінші бетінде «Өмір ағашы», «Қазақ елі» монументіндегі киелі құстың суреті бір-біріне үйлесіп тұрғандай. Мұның барлығы да тарихы тереңге тамыр жаятын тәуелсіз еліміздің жүріп өткен жарқын жолдары іспетті.
Банкнотта елге еңбегі сіңген тұлғаларды, ел президенттерін бейнелеу жаңашылдық емес. Ол дамыған озық елдердің тәжірибесінде бұрыннан бар. Мысалға, Мұстафа Кемаль Ататүрік, Ли Куан Ю, Нельсон Мандела сияқты тұлғалар өз елдерінің ұлттық валюталарында бейнеленген еді. Ұлт Көшбасшысы Нұрсұлтан Назарбаевтың ұлттық валютамызда бейнеленуі сол тарихи үрдістің бір көрінісі болса керек. Банкнот айналымға түскеннен бастап, оны кез келген қазақстандық зор мақтанышпен ұстайтынына күмәнім жоқ.
Ғосман ТӨЛЕҒҰЛ,
«Ардагерлер ұйымы» республикалық
қоғамдық бірлестігінің Ақмола облыстық
филиалының төрағасы.
