Облыстық сотта сот жүйесінде қолданылатын жаңа электронды технологиялармен таныстыру шарасы өтті. Шараға қоғамдық ұйымдардың және бұқаралық ақпарат құралдарының өкілдері қатысты.
«100 нақты қадам» Ұлт жоспарында заң үстемдегін қамтамасыз ету мақсатында сот жүйесінің алдына 11 міндет қойылған еді. Солардың қатарында барлық сот үдерістеріне дыбыс және бейнетіркеу жүйесін енгізу бар. Бұған қалай қол жеткізуге болады?
Облыстық соттың төрағасы Нұрғазы Әбдіқанов осы жайында жан-жақты айтып берді. Сот төрағасының айтуынша, бүгінгі күні облысымыздың аумағында барлық сот залдары жүз пайыз дыбыс және бейнетіркеу жүйесімен жабдықталған. Бұл сот жұмысының ашықтығы мен жеделдігін және қолжетімділігін қамтамасыз етеді.
Үстіміздегі жылдың он айы ішінде «Электронды сот кабинеті» арқылы 19983 құжат, оның ішінде 17646 талаптар мен арыздар тіркелген. Ақпараттық технологиялар және ақпараттық ресурстарды қорғау бөлімінің басшысы Асхат Мақышев «Сот кабинеті» сервисінің тиімділігіне тоқталып, азаматтар үйінен шықпай, интернет желісі арқылы өзіне қажетті арыздар мен өтініштерді жазуға, сот шешімдерімен танысуға мүмкіндік алғандығы туралы айтты.
Сот қызметінің сапасын жақсарту мақсатында сот отырыстарына қатысушылар арасында online-сауалнамалар өткізіліп тұрады. Биылғы жылы сауалнамаға қатысушылардың 87 пайызы осындай ақпараттық технологиялар енгізгеннен соң сот төрелігінің қолжетімді болғанын растайды. Олардың 82,2 пайызы соттардың ашық деңгейінің қанағаттандыратынын, 84,4 пайызы дыбыс және бейнетіркеу жүйесін қолдану істерді қараудың сапасын арттыратындығына сенім білдірген.
