Қуаныш Жанқадамов басқаратын «Арман» Атбасар Агро» серіктестігінің наубайхана қызметкерлері тұтынушылар көңілінен шығуда.
Аталмыш серіктестіктің наубайханасы 2002 жылдан бері жұмыс істеп, мол табысқа қол жеткізді. Осының арқасында кәсіпорын жаңа ғимарат салып, шетелдік қондырғылар сатып алды. Жаңа жұмыс орындарын ашты.
– Күніне үш мың бөлке нан, бес түрлі тоқаш өнімдерін пісіреміз. Күнбағыс майын «Сочинский» серіктестігінен литрін 320 теңгеден сатып аламыз. Ыстық нан наубайхана қасындағы «Тұмар» дүкенінде сатылады. Қара нанға сұраныс көбейді. Ұнды құрғақ әрі қараңғы орында сақтайтын арнайы қондырғы сатып алмақшымыз. Бұл әдіс өнім сапасын жақсартады. Нысан өз бу қазандығымен жылытылады,–дейді «Мирас» шаруа қожалығының басшысы әрі наубайхана меңгерушісі, аудандық мәслихаттың депутаты Сәуле Ақсейітова бізбен әңгімесінде.
Аудан орталығында орналасқан екі наубайхана арасында бәсекелестік бар екенін аңғардық. Бұл өнім сапасына игі әсер етеді деген ойда болдық. Жылжымалы кестемен бір ауысымда екі адам жұмыс істейді. Наубайхананың Италияда жасалған пештерінен иіс шықпайды. Екінші цехта ұн еленіп жатыр. Піскен нан қоймада көп жатпайды екен. Арнайы автокөлікпен қала дүкендеріне және елді мекендерге тасымалданады. Бір бөлке нан дүкендерде 55 теңгеден сатылады. Кәсіпорын қайырымдылық шарасын жиі өткізіп, егде адамдарға нанды тегін таратады.
–Шаруашылықтың кеңсесі №86 разъезде орналасқан. Серіктестік егіншілікпен және мал шаруашылығымен айналысады. Мұнда арпа мен бидай өсіріледі, қазақтың ақбас ірі қарасы, жылқы және еділбай қойы бағылады,– дейді «Мирас» шаруа қожалығының басшысы. Біз Сәуле пісірген дәмді наннан ауыз тиіп, аттандық.
