Бұл оқиға жаңа жылдың алғашқы күні Аршалы кентінде орын алды.
Учаскелік инспектор шақыртумен төбелес шыққан жатақханаға келеді. Араққа тойып, бір-біріне жұдырық ала жүгірген екі жігітті әзер айырған инспектор оларды медициналық сараптама алу үшін ауруханаға жеткізеді.
Дегенмен, мас жігіттің бірі ауруханада полиция қызметкеріне мойынсұнбай, тіпті, қол көтеріп күш жұмсамақ болады. Бірақ, учаскелік инспектор оңай шағыла салатын жаңғақ емес екен, бұзақының қолын қайырып, ішкі істер бөліміне жеткізеді. Ауданда полиция қызметкеріне қоқан-лоққы көрсету оқиғасы жалғыз бұл емес. Осының алдында Астанадан келген бір азамат құқық қызметкерін балағаттап, тіл тигізгені үшін қамауға алынған болатын. Полицейге қол көтерген бұзақы осы қылығы үшін енді 4,5 миллион теңге көлемінде айыппұл төлейді немесе екі жылға дейін бас бостандығынан айырылу жазасына кесілуі мүмкін.
«Арқа ажарының» өз ақпараты.
Аршалы ауданы.
