Ерейментау қаласында баспасөз саласының өсіп-өркендеуіне елеулі үлес қосқан КСРО Журналистер одағының мүшесі, марқұм Серік Дәулетбекұлы Жұматовтың 75 жылдығына орай, «Тарих шежіресінде ізі қалған» атты еске алу кеші болып өтті.
Аталған шараға Серік Жұматовтың жан жары, балалары мен достары, ағайын-туысқандары қатысты. Бөгенбай батыр атындағы тарихи-өлкетану музейінің қызметкері Мәнап Әдірешев білікті журналистің өнегелі өмір жолын айтып, азаматтық тұлғасы жайында тағылымды сыр шертті. Сондай-ақ, кеш барысында жиналған қауымға қаламгер өмірінен сыр шертетін бейнебаян ұсынылды. Жылдар бойы аупарткомда, сондай-ақ, редакцияда бірге қызмет атқарған әріптестері мен замандастары Қайрат Өсіпов, Мақсұт Баймұрынұлы, Олжахан, Сағат Айдаболовтар, Дәметкен Әдірешева оның еңбекқорлығы мен адамгершілік қасиеттерін, абыройлы азамат болғанын қадап айтты. Әсіресе, журналистің сыныптас досы Серік Сыздықов: «Мен үшін адал, ақкөңіл, елгезек Серіктің орны бөлек. Бала кезімізден бірге өстік. Мектепте жүріп, жазуға ерекше қызығушылық танытқан азаматтың туған жеріне аянбай қызмет еткені, қарымды қаламгер атанғаны жұртқа мәлім. Мәнді де мазмұнды ғұмыр кешкен досымызды біздер ешқашан да ұмытпаймыз», – деп қызықты естеліктерімен бөлісті. Кеште мектеп оқушылары ақиық ақын Мұқағали Мақатаевтың өлеңдерін мәнерлеп оқып, қасиетті домбырамен тебіренте күй шертті.
Шара соңында Серік ағаның жары Тыныштық Жәниқызы әсерлі кештің өтуіне ықпал жасаған азаматтарға алғысын әрі ризашылық пейілін білдірді. Соңынан ас беріліп, марқұмның рухына арнап құран бағышталды.
Гүлдана ҚАНАПИЯНОВА.
Ерейментау ауданы.
