Қазақстан Республикасы Қаржы министрлігі Ішкі мемлекеттік аудит комитетінің Ақмола облысы бойынша ішкі мемлекеттік аудит департаменті өткен жылы бюджет қаржысын тиімді жұмсау жөнінде 194 тексеріс өткізді.
Оның барысында департамент 20 миллиард 298 миллион 66,4 мың теңгенің бюджеттік қаржысын тексеріп, 12 миллиард 559 миллион 356,05 мың теңгенің немесе жалпы соманың 61 пайызы бойынша заң бұзушылықты анықтады. Есептік кезеңде департамент заң бұзушылық бойынша аудит нысандарындағы лауазымды тұлғаларға айыппұл түрінде әкімшілік шара қолдану жөнінде 89 қаулы шығарып, заңды тұлғаларға 16 миллион 989,210 мың теңге айыппұл салды.
Оның ішінде мемлекеттік сатып алу жөніндегі Қазақстан Республикасы Заңнамасын бұзғаны үшін әкімшілік заң бұзушылық жөніндегі Қазақстан Республикасы Кодексінің 207-бабы бойынша 61 қаулы шығарылды. Заңды тұлғаларға бухгалтерлік тіркеу және қаржы есебі жөнінде Қазақстан Республикасы Заңнамасын бұзғаны үшін әкімшілік заң бұзушылық жөнінде Қазақстан Республикасы Кодексінің 239-бабы бойынша 25 қаулы шығарылды. Салынған айыппұлдың жалпы сомасынан бюджет кірісіне
16 миллион 649,850 мың теңге қайтарылды. Бұл жалпы айыппұл сомасының 98 пайызы.
Талғат ДҮЙСЕНБЕКОВ,
Ақмола облысы бойынша ішкі
мемлекеттік аудит департаменті
басшысының орынбасары.
