өрт сөндіруші Галина Салионова туралы бір үзік сыр
Көкшетау қаласындағы №1 өрт сөндіру бөлімшесінде биыл да өзге жылдардан еш айырмашылығы жоқ, егіз қозыдай ұқсас жұмыс күндері өтіп жатыр. Күн сайынғы тынымсыз жаттығулар, ара-тұра болатын оқыс оқиғалар. Яғни, өмірдің ағысы арнасынан аумай, жылжып жатқан тәрізді. Бірақ, шын зер салып, санамен салмақтаған адамға елді елең еткізетін соны жаңалық та бар.
Шындығын айтқанда, өрт сөндірушілердің жұмысы оңай-оспақ шаруа емес. Оған ыстық-суыққа бірдей төзімді, ыстық тілін жалаңдатып төніп келген қауіп-қатерден қаймықпайтын, сындарлы сәтте сыр бермей, шыдай алатын жігіттің жігіті ғана төтеп бермек. Ал, оның орнында қырдың қызғалдақ гүліндей нәп-нәзік қыз жүрсе ше. Адам сенбес еді. Өртпен күрес дегеніңіз өрттей қаулап келген кездейсоқта тап болған қиындықпен күрес емес пе. Біздің Галина Салионова жүрек қалауымен осы мамандықты таңдаған. Өрт сөндіруші – нағыз құтқарушы. Аз ғана уақыттың ішінде өзінен бұрын еңбек әліппесін бастаған, осы бір мамандықтың қыр-сырын біршама меңгерген әріптестерін кәсіби шеберлігі жағынан басып озды. Оның шалт іс-қимылы, түйінді шешім қабылдауы, өз міндеттерін мүлтіксіз атқаруы, өрт сөндіру техникасының жабдықтарын сәтімен қолдануы алғашқы сынақтарда белгілі бола бастады. Алайда, теория мен тәжірибе қабыса бермейді ғой. Сынақтың аты сынақ. Ал, төтенше оқиға кәдімгі саперлардың қағидасы іспетті. Бұл жерде де бар болғаны бір-ақ рет қателесуің мүмкін. Осының бәрін салмақтай келгенде әншейінде әйелге тән жеңілдеу мамандықты неге қаламаған деп те ойлайсың.
Галина Вадимовна қазір ұжымға тастай батып, судай сіңген жауынгер. Ол өзінің мінез-құлқының арқасында әріптестерімен тіл табысып, сенімдеріне ие болып кетті. Ал, бұл жұмыста бір-біріне деген сенім керек-ақ. Ендігісі ел сенімін ақтау.
Жанат СЕКСЕМБАЕВ,
Көкшетау қалалық №1 өрт сөндіру бөлімшесінің бастығы.
