Өндірісте орын алатын апаттардан қанша адамдар денсаулықтарынан айырылып, мүгедек болып, тіпті, өмірлерімен қоштасып жататын жайлар аз кездеспейді.
Өндірісте орын алып жататын бақытсыз оқиғалардың салдарын жойғаннан гөрі, оның алдын алудың тиімді болатыны айтпаса да түсінікті. Осы орайда, еңбек инспекциясы өндірістік апаттарға жол бермеу жөніндегі үгіт-насихат жұмыстарына жете көңіл бөліп келеді.
Тек өткен жылы ғана инспекция мамандары жер-жерде болып, өндіріс ұжымдарымен 120 семинарлар мен сабақтар өткізіпті. Бұл шаралар үш мыңнан астам адамды қамтыған. Сонымен бірге, ақпарат құралдарында мақалалар жарияланып, жергілікті теледидардан арнайы хабарлар беріліп тұрады.
Облыстық еңбек инспекциясы басшысының орынбасары Дүйсенбек Баймұсыновтың айтуынша, осы бағытта жүргізілген насихат жұмыстарының нәтижесінде өндірісте кездесетін бақытсыз оқиғалар саны жыл санап азайып келеді. Мәселен, 2014 жылы осындай 18 оқиға орын алса, 2015 жылы – 17, ал, 2016 жылы – 12 оқиға болған. Биылғы жылдың басынан бері өндіріс апаттары орын алған жоқ.
Көкшетау және Степногорск қалаларындағы оқу-кеңес беру орталықтарында өндіріс орындарының басшылары мен техника қауіпсіздігіне жауап беретін мамандары арнайы оқу курстарынан өтіп тұрады. Бұл да өндірістік апаттардың алдын алуға айтарлықтай ықпалын тигізуде.
«Арқа ажарының» өз ақпараты.
