Бурабай курортында желкенді регатадан жарыс өтіп, үздіктер марапатталды.
«Бурабай-2017» атты шараға Щучье көлінің жағасында ашылған «BurabayMarineClub» яхт клубының мүшелері ұйытқы болған. Желкенді регата жарысына еліміздегі және Ресейдің Омбы, Екатеринбург тәрізді қалаларынан келген тәжірибелі және жас яхташылар қатысып, шеберліктерін ортаға салды. Қазақстанның намысын қорғағандардың арасында көкшетаулықтар: 2012 жылы Хайкоу қаласында өткен Әлем чемпионатының жүлдегері, кайтсёрфингтен спорт шебері Александр Пархоменко мен 2015 жылы желкенді спорт бойынша Ресей Федерациясының чемпионы Сергей Воронов болды.
Шараға Ақмола облыстық туризм басқармасының басшысы Шынарбек Батырханов қатысып, құттықтау сөз сөйледі. Жарыс жеңімпаздары алты кезең бойынша анықталды. Нәтижесінде ең көп ұпай жинаған Ольга Шердакова бастаған Екатеринбург қаласынан келген «Спрей» командасы жеңімпаз атанса, жүлделі екінші орынға көкшетаулық Сергей Вороновтың «Очаг» командасы лайық деп танылды. Ал, Александр Пархоменко бастаған тағы бір көкшетаулық «Блюз» командасы үшінші орыннан көрінді.
Желкенді регата жарысы бард әнімен аяқталды. Оның ішінде жерлес суретші, туризм тақырыбындағы көптеген әндердің авторы Рашид Миниханов ең үздік бард атанды.
Бурабай ауданы.
