Облыстық көлік бақылау инспекциясы«Жолда қабылдау» республикалық акциясын өткізіп, жүргізушілерді мазалаған сауалдарға жауап берді.
Бұл акцияға «Нұр Отан» партиясы облыстық филиалының, облыстық мемлекеттік қызмет істері және сыбайлас жемқорлыққа қарсы іс-қимыл департаменті, Көкшетау көлік прокуратурасының және облыстық кәсіпкерлер палатасының өкілдері қатысып, республикалық маңызы бар «Астана-Петропавловск» автокөлік жолында үлкен жүк автокөліктерінің жүргізушілерін қабылдап, жол және көлік қауіпсіздігін қамтамасыз ету, көлік заңнамасының нормалары мен халықаралық келісімді сақтау, қоғамда сыбайлас жемқорлыққа қарсы пікір қалыптастыру мәселелері жөнінде құқықтық кеңес берді.
–Акция облыстық көлік бақылау инспекциясының жұмысы жөнінде тасымалдаушылардың пікірін білу үшін ұйымдастырылды. Жүргізушінің әртүрлі жағдайдағы іс-әрекеті жөнінде құқықтық кеңес берілді,–дейді облыстық көлік бақылау инспекциясының бөлім басшысы Әлібек Айдарханов бізбен әңгімесінде. Жүргізуші Александр Кузнецов мұндай акция жүк тасымалдаушылар үшін қажет екенін, көптеген жүргізушілер өз құқы мен міндетін білмейтінін айтып берді. Алдағы уақытта мұндай шара облыстың барлық аудандарында тұрақты негізде жүргізілетін болады.
«Арқа ажарының» өз ақпараты.
