Есіл қаласындағы №7 агротехникалық колледж оқушылары өндірістік тәжірибеден өту арқылы 1,5 миллион теңгеден астам табыс тапқан.
Дуалды жүйе бойынша оқытылып жатқан аталмыш колледж оқушылары теориялық білімдерін өндіріс орындарында тәжірибемен ұштастыруда. 2015 жылдан бастап, колледж оқушылары дуалды жүйе бойынша «тамақтандыруды ұйымдастыру» мамандығы бойынша оқытылуда. Өткен жылы облыстық кәсіпкерлер палатасында білім ордасы, өндіріс және оқушылар арасында үшжақты 39 келісім шарт жасалды.
Осыған орай, жыл сайын көктемгі және күзгі дала жұмыстары кезінде ауыл шаруашылығы тауарларын өндірушілер «Фермерлік шаруашылық», «Дәнекерлеу ісі» мамандықтары бойынша білім алып жатқан колледж оқушыларын кәсіби тәжірибеден өткізуге қабылдайды. Колледж директорының орынбасары Наталья Бойконың айтуына қарағанда, шәкірттер өткен жылы өндірістік тәжірибе арқылы 1,5 миллион теңгеден астам табыс тапқан. Оқушылардың тәжірибеден өтуі үшін өндіріс орындарымен жасалған келісім негізінде оқу кестесі жасалынған. Білім ордасымен белсенді жұмыс істеп отырған «Шаңырақ Р», «Орловка», «Московское», «Агро-Олдиви» серіктестіктері, «Қаракөл» ауыл шаруашылығы кооперативі және «Айгүл» шаруа қожалығы тәрізді өндіріс орындары бар.
«Арқа ажарының» өз ақпараты.
Есіл ауданы.
