Бұл күндері әйел азаматының еңбек етпейтін саласы жоқ. Кейде тіпті, ерлермен теңесіп, талай қиын істерге қол созып жатады. Осының бәріне әрине, сүйсінесің.
Әйелдердің мұндай өжеттігінен Ақмола өңірі де кенде емес. Сондай жандардың бірі ретінде Зеренді ауданындағы «Парус» демалу орталығының директоры Арман Сұлтанованы айтуға болады. Заман ағымынан қалыспай бірді бірге жалғап екеу қылып жүрген азаматшаның бүгіндері кәсібі аяғынан тік тұрып, ісі оңға басып келеді. Кәсіпкер тоқырау жылдары ешкімге керексіз болып, жабдықтары ұстағанның қолында, тістегеннің аузында кеткен пионер лагеріне осы күні екінші өмір сыйлап отыр.
Бүгінгі таңда Зеренді көлінің жағасындағы «Парус» демалу орталығы демалушыларға қысы-жазы қызмет көрсетеді. Туристер жаз маусымында айдын көлде қайықпен жүзіп, суға шомылса, күз және қыс айларында атқа мініп, шаңғы, коньки, бұғы және қар шанасымен серуендеп қайтады. Осыдан-ақ, білек сыбанып, өмірде өз биігіне ұмтылған жанның қолынан бәрі де келетінін аңғаруға болады. Оған өңірде туризм саласының дамуына үлес қосып жүрген Арман Олжабекқызының тірлігі айқын дәлел.
«Арқа ажарының» өз ақпараты.
Зеренді ауданы.
