Көкшетау қаласының мәдениет және тілдерді дамыту бөлімінің ұйымдастыруымен халық ауыз әдебиетінің інжу маржандарын кеңінен насихаттау, Тазша бала бейнесі арқылы қазақ халқының тапқырлығын, әзілкештігін, ұлттық өнерді насихаттау мақсатында «Тазша бала» байқауы болып өтті. Байқауға бастауыш мектеп жасындағы 7-12 жас аралығындағы оқушы балалар қатысты.
«Тазша бала» байқауы үш кезеңнен тұрды. «Айтпаймын, қыз берсең де, өтірікті» бөлімінде оқушылар сөзіне бір ауыз шындық қоспай, өзін таныстыру қажет болса, «Тышқан мініп қой бақтым» сайысында көрініс қойылды. Ал, соңғы бөлімде әр қатысушы пародия, пантомима, этюд, монолог, тағы басқа жанрлар бойынша өнер көрсетті.
Халық «Тазша баланың кырық өтірігі» жөніндегі ертегіні де ұрпақтан-ұрпаққа қастерлей жеткізіп келеді. Бұл – өтірік өлеңнің қазақ фольклорындағы көне де дәстфүрлі жанр екендігін көрсетеді. Тазшадай тапқырлығы мен шешендігін көрсетіп, өнерін ортаға салған өрендер сайыс соңында естелік сыйлықтармен марапатталды.
Байқау қорытындысы бойынша жүлделі бірінші орынмен Көкшетау қаласындағы ІТ мектеп-лицейінің оқушысы Жақып Әлішер марапатталса, екінші орынды №19 орта мектебінің оқушысы Таңатар Бақдәулет иеленді. Ал, №6 орта мектеп лиейінің оқушысы Ақан Мирас үшінші орыннан көрінді.
Өнер додасына қатысқан барлық өрендердің барлығы ұйымдастыру алқасының арнайы сыйлығымен марапатталды.
«Арқа ажарының» өз ақпараты.
