Ақмола облыстық ішкі саясат басқармасының ұйымдастыруымен Мағжан Жұмабаев атындағы облыстық әмбебап-ғылыми кітапханасында
үш тілді жетік меңгерген жастарды анықтау және ынталандыру, қазақстандық патриотизмді нығайту, тілдік мәдениетті тәрбиелеу мақсатында «Тілдарын» облыстық олимпиадасы өтті.
Ереже бойынша олимпиадаға 18-22 жас аралығындағы жастар қатысты. Олимпиада төрт кезеңнің тапсырмаларынан тұрды. Биылғы байқаудың басты ерекшелігі тапсырмалар кезеңіне ҚАЗТЕСТ жүйесінің қосылуы болды.
Олимпиадаға Көкшетау, Степногорск қалалары мен Ақкөл, Атбасар, Бурабай, Бұланды, Есіл, Зеренді, Жақсы, Қорғалжын, Шортанды аудандарының үміткерлері қатысып, өз білімдерін сарапқа салды.
Ақмола облыстық оқу-әдістемелік орталығының қазақ тілі пәнінің оқытушысы Ләззат Қоқышева, Ш.Уәлиханов атындағы Көкшетау мемлекеттік университеті орыс филологиясы және кітапхана ісі кафедрасының аға оқытушысы Сапар Қасенов, Ж.Мусин атындағы Көкшетау жоғары қазақ педагогикалық колледжі шет тілдері кафедрасының меңгерушісі, педагогика және психология ғылымдарының магистрі Гүлзат Мыңбаева олимпиадаға қатысушылардың білімдерін бағалады. Байқауға бағын сынамаққа келген жастардың тілдерді меңгеру деңгейі, жазу сауаттылығы мен дыбыстардың дұрыс айтылуы, жауаптың оралымдылығы мен толықтығы, жауаптың мазмұндылығы мен ерекшелігі, сахнада өзін-өзі ұстауы, берілген уақытын дұрыс пайдалануы ескерілді.
«Алуан-алуан жүйрік бар, бабына қарай шабады» демекші, қазылар алқасының шешімімен үш тілді жетік меңгерген білімді жастар арасынан үздік деп танылған көкшетаулық Қуаныш Қайырова жүлделі 1-ші орынмен марапатталды. Ал, Жақсы ауданының бұл байқауға үкілеп қосқан жас дарыны Әсел Жаңабергенова жүлделі 2-ші орынға ие болды. Степногорск қаласының тұрғыны Айнагүл Зинулла 3-ші орынды қанжығасына байлады.
Олимпиада жеңімпаздары дипломдар, Алғыс хаттар және ақшалай сертификаттармен марапатталды. Ал, байқаудың 1-ші орын иегері Қуаныш Қайырова қазан айында Шымкент қаласында өтетін республикалық «Тілдарын – 2019» олимпиадасында Ақмола облысының намысын қорғайтын болады.
«Арқа ажарының» өз ақпараты.
Суретте: байқаудан көрініс.
