Ақмола облыстық кәсіпкерлер палатасында Қазақстан Республикасының Президенті Қасым-Жомарт Тоқаевтың ел халқына арнаған «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауын түсіндіру аясында дөңгелек үстел болып өтті.
Дөңгелек үстелді «Kazakhstan Innovations» қоғамдық қорының төрайымы Мәриям Әбішева ашып, жүргізіп отырды. Ол өз сөзінде «Астана» халықаралық қаржы орталығының келешекте жаңа цифрлық технологияны дамытуға мол мүмкіндік туғызатыны жөнінде айтып берді. Жиында сөз алған «Nur Otan» партиясы Ақмола облыстық филиалы төрағасының бірінші орынбасары міндетін атқарушы Азамат Біржанов Жолдаудың бес басымдық бағыты жөнінде айтты.
– Мемлекет басшысы еліміздің даму жолын бүкіл әлем мойындағанын, оның қазақстандық, яғни, Назарбаев моделі деп аталғанын айта келе, Тәуелсіздіктің жетістіктерін еселеп, елімізді дамудың жаңа сапалы кезеңіне шығаруға Елбасы саясатының сабақтастығын сақтап, жүйелі реформалар жүргізу арқылы қол жеткізе алатынымызды атап көрсетті.
Ақмола облыстық мемлекеттік кірістер департаменті басшысының орынбасары Мұратбек Мусин өз сөзінде өңірде салықтың әділ салынуы және қаржыны дұрыс реттеу жөнінде айтып берді. Бұдан кейін сөз сөйлеген Ақмола облыстық ауыл шаруашылығы басқармасы басшысының міндетін атқарушы Қасым Итқұсов өңірдегі агроөнеркәсіп кешенінің дамуы жөнінде хабардар етті.
Ақмола облыстық кәсіпкерлер палатасының бөлім басшысы Раиса Ескендірова өңірде «Қарапайым заттар экономикасы» бағдарламасының жүзеге асырылуы жөнінде айтты. Ш.Уәлиханов атындағы Көкшетау мемлекеттік университетінің проректоры міндетін атқарушы Серік Қайырденов өз сөзінде сапалы білім жетістік жолы және экономиканы дамытудың басты құралы деген ойды өрбітті. Сондай-ақ, облыстық білім басқармасының бөлім басшысы Бекжан Сәдуақасов Ақмола облысындағы білім сапасы жөнінде өз пікірлерін білдірді.
Рамазан ТІЛЕУОВ,
«Арқа ажарының» өз тілшісі.
