Жемқорлыққа қатысты заң бұзушылықтың ең көп орын алатын саласы жерге қатысты болып отыр. Жерге қатысты заңнамаларды бұзу оқиғалары әсіресе, Елорда маңындағы елді мекендерде және Бурабай курортты аймағында жиі көрініс беруде.
Облыстық прокуратура биылғы жылдың ақпан айында Бурабай кентінде жер телімін пайдалануға қатысты заң бұзушылықты анықтады. 4 ақпанда Бурабай кенті әкімінің өкімімен елді мекеннің бас жоспарына сәйкес келмейді деген себеппен жергілікті кәсіпкердің жер телімін уақытша пайдалану құқығын одан әрі созудан бас тартылған. Бас жоспарға сай келмейтін құрылыс нысанын салмақ болған кәсіпкердің әрекетіне жол бермеген кент әкімінің бұл шешімі жөн екен дейсің. Бірақ та, қызығы сол, арада он бес күн өткенде әлгі кәсіпкердің дәл сол құжаттарды ұсына отырып қайталап берген өтініші қанағаттандырылып, жер телімін пайдалану құқығы ұзартылған. Прокуратура қызметкерлері кейінірек анықтағандай, кәсіпкердің құрылыс нысанының нақты жобасы жөніндегі құжаты жоқ болып шықты. Оған қоса, Бурабай аудандық жер қатынастары бөлімінің қорытындысы бойынша бұл жер телімі қонақүй тектес нысандар салуға болмайтын аймаққа жатады екен.
Сонымен, кенттің бас жоспарына сай келмейтін, оның үстіне нақты құрылыс жобасы жоқ және қонақүй салуға тыйым салынған аймақта орналасқан жерге құрылыс салуға рұқсат берген кент әкімдігінің бұл әрекетін қалай түсіндіруге болады? Әкімдіктің бұл шешімі заң атаулыны теріске шығарып тұрған жоқ па.
Заңсыздыққа жол берген Бурабай кентінің әкімі мен аудандық жер қатынастары бөлімінің басшысының үстінен тәртіптік іс қозғалып, ескерту түріндегі жаза қолданылды. Айта кету керек, жыл басынан бері Бурабай ауданында жер телімдерін пайдалануға қатысты 20 заң бұзушылық оқиғасы анықталған.
Қ.КЕЛДІҒҰЛҰЛЫ.
Бурабай ауданы.
