«Әлеуметтік медициналық сақтандыру қоры» КЕАҚ дәрі-дәрмекпен қамтамасыз етудегі келеңсіздіктердің алдын алу үшін «СК-Фармация» компаниясымен жасалған шарттар бойынша 100 пайыз алдын ала төлем жасады.
Бұл бірыңғай дистрибьюторға жыл соңына дейін жеткізілетін препараттар үшін өнім берушілер мен өндіруші зауыттарға алдын ала төлем жасауға мүмкіндік берді. Бұл туралы Әлеуметтік медициналық сақтандыру қорының басқарма төрағасы Болат Төкежанов Орталық коммуникациялар қызметі алаңында өткен брифингте мәлімдеді.
Медициналық сақтандыру қорының өкілі мемлекеттік әлеуметтік медициналық сақтандыру қаражаты есебінен амбулаториялық деңгейде балаларды бактерияға қарсы және қызуды төмендететін препараттармен, ересектерді – ауруханадан тыс пневмония нозологиясы бойынша бактерияға қарсы құралдармен қамтамасыз ету қарастырылғанын атап өтті. 2020 жылдың 1 қаңтарынан 17 шілдесіне дейін ЖРВИ және пневмониямен ауырған 165 мың пациент 190,3 миллион теңгені құрайтын тегін дәрі-дәрмек алды.
Сондай-ақ Денсаулық сақтау министрлігі бастапқы буындағы дәрігерлермен тағайындалатын дәрі-дәрмектің тағы 5 түрін қосу мәселесін қарастыруда. Бұл тізімге «Парацетамол», «Ибупрофен», «Ривароксабан», «Апиксабан», «Дабигатран» енгізілді. Бұл препараттармен үздіксіз сатып алу үшін Қор Денсаулық сақтау министрлігі тиісті бұйрыққа өзгерістер енгізгеннен кейін өңірлік денсаулық сақтау басқармаларының өтінімдері негізінде қаржыландыруды қамтамасыз етеді.
Еске сала кетейік, медициналық сақтандыру қоры дәрі-дәрмекпен қамтамасыз етуді стационарлық және амбулаторлық деңгейде ТМККК және МӘМС пакеті шеңберінде қаржыландырады.
Ы.Шамшиева.
