Орталық коммуникациялар қызметі алаңында журналистердің сұрақтарына жауап берген сарапшылар вакцинаның жыныстық бездер функцияларына әсері туралы тағы бір мифті жоққа шығарды. ҚР ДСМ фтизиопульмонология Ұлттық ғылыми орталығының профессоры, медицина ғылымдарының докторы, директордың клиникалық және ғылыми жұмыстар жөніндегі орынбасары Ләззат Ерәлиева ешқандай проблемалар болмайтынына сендірді.
«Вакцинаны халыққа қолданбас бұрын жануарларға зертханалық көптеген клиникаға дейінгі зерттеулер жүргізіледі. Бедеуліктің пайда болу қаупі – вакцина қауіпсіздігінің маңызды өлшемдерінің бірі. Бұл міндетті түрде зерттеледі. «Спутник V» де басқа вакциналар сияқты және «Kaz-Covid-in» де репродуктивті функцияға әсер етпейді. Егер біздің қазақстандық вакцина туралы бөлек айтатын болсақ, оның технологиясы 80 жылдан астам уақыт бойы қолданылып келеді. Осылайша тұмауға, полиомиелитке, кене энцефалитіне қарсы вакциналар әзірленді. Олардың жыныстық бездер функциясына ықтимал әсері баяғыда зерттеліп қойған. Олар бедеулікке апармайды», – деді сарапшы.
