ҚР Еңбек және халықты әлеуметтік қорғау министрі Серік Шәпкенов Мәжіліс депутаты Аманжан Жамаловтың зейнетақы жинақтарының ең төменгі жеткілікті шегін қолдану мерзімін жылдың соңына дейін ұзартуға қатысты ұсынысына пікір білдірді, деп хабарлайды ҚазАқпарат тілшісі.
Министр Сенатта тілшілер сауалына жауап бере отырып, ведомствоға тиісті ұсыныс келіп түспегенін айтты. Кез келген ұсынысты министрлік егжей-тегжейлі пысықтап, өзінің ұстанымын жариялайтын болады. Сонымен қатар С. Шәпкенов зейнетақы жинаған бірінші кезекте лайықты деңгейде болуы керек екенін атап өтті. «Жеткілікті шегіне тоқталсақ, бұл мәселеге түрлі призмалар арқылы қарау керек.
БЖЗҚ – ол адамдардың өзінің лайықты зейнатақысына жинаған қаражаты. Осыдан қаражатты үнемі ала берсек, онда ертең адам зейнет жасына жеткенде ең төменгі зейнетақыны алатын болады. Бұл дұрыс па? Сондықтан Еңбек министрілігі бірінші кезекте болашақ зейнеткерлердің құқығын қорғайды. Бұл тұрғыда біздің ұстанымды айтатын болсақ, ел азаматтары зейнет жасына жеткенде, оның табысына сәйкес лайықты зейнетақысы болуы керек», – деді министр.
Айта кетейік, әлеуметтік желіде ҚР Парламенті Мәжілісінің депутаты Аманжан Жамалов Үкіметті зейнетақы жинақтарының ең төменгі жеткілікті шегін қолдану мерзімін 2022 жылдың соңына дейін ұзартуға шақырды.
