Қазақстан Республикасының Президенті жанындағы Әйелдер істері және отбасылық-демографиялық саясат жөніндегі ұлттық комиссия төрайымының орынбасары Салтанат Тұрсынбекова Ақмола облысында жұмыс сапарымен болды.
Бұл сапардың мақсаты өңірлік комиссияның қызметімен жақынырақ танысып, өскелең ұрпақты тәрбиелеуге, балалардың қауіпсіздігін қамтамасыз етуге қоғамның назарын аудару болып табылады. Салтанат Тұрсынбекова сапар аясында өңірлік комиссия мүшелерімен, Көкшетау қаласының көп балалы аналарымен, мектеп психологтарымен, Краснояр ауылындағы емхана қызметкерлерімен кездесті.
Кездесулер барысында Салтанат Тұрсынбекова мемлекеттік отбасылық саясатты іске асыру жөніндегі ағымдағы ахуал, саланың өзекті мәселелері, Қазақстан Республикасында 2030 жылға дейінгі отбасылық және гендерлік саясат тұжырымдамасын іске асыру барысы туралы тарқатып айтып берді. Жиынға қатысушылар өздерін толғандыратын сұрақтарды қойып, оларға тұшымды жауап алу мүмкіндігіне ие болды.
Аталмыш сапар Қазақстан Республикасы Президенті әкімшілігі басшысының орынбасары, Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның төрайымы Аида Балаева бекіткен Ұлттық комиссия мүшелерінің жергілікті жерлерге шығу кестесін орындау мақсатында жүзеге асырылып отыр.
«Арқа ажарының» өз ақпараты.
