– Құқық қорғау қызметкерлеріне қарсылық көрсеткендерге көзден жас шығаратын газ бен су атқыштар қолданылды. Наразылық әрекеттері Францияның өзге де қалаларында өтті, деп хабарлайды ҚазАқпарат Deutsche Welle агенттігіне сілтеме жасап.
Парижде үкіметтің бастамасымен қолға алынған зейнетақы реформасына қарсы наразылық шарасына 6 мыңға жуық адам шықты. Қаланың орталығында наразылық білдірушілер полициямен қақтығысып, нәтижесінде 16 наурызда 217 адам қамауға алынды.
Полиция қызметкерлеріне түрлі заттарды лақтырып, қарсылық көрсеткендерге қарсы көзден жас шығаратын газ бен су атқыш құрылғылар қолданылды. Наразылық акциялары Марсель, Дижон, Нант, Ренн, Руан, Гренобль, Тулуза және Ницца қалаларында өтті.
AFP басылымының жазуынша, Марсельде шерушілер бірнеше дүкенді талқандаған. Нант пен Ренне және Лионда тәртіп сақшылары мен ереуілшілер арасында қақтығыс болды.
Айта кетейік, Францияда ұзақ уақыт зейнетақы реформасына қарсы ауқымды наразылық шаралары өтті. Елдің қалаларында миллионға жуық адам көшеге шықты. Соның ішінде Парижде ғана 300 мың адам ереуілдеткен.
Әлеуметтік сауалнама нәтижесі бойынша, реформаға Франция халқының 76% қарсы болған. Алайда елде мыңдаған адамның қатысуымен өткен наразылық шараларына қарамастан Франция сенаты күдік тудырған реформаны қолдады. Реформа зейнетақы жасын 62-ден 64-ке дейін көтеруді көздейді. Заң жобасы Парламентта талқылауға алынды.
