— Францияда 1 мамыр шеруіне жүздеген мың адам жиналып, халықтың көңілінен шықпаған зейнетақы реформасына наразылық білдірді, деп хабарлайды ҚазАқпарат Euronews-ке сілтеме жасап.
100-ден астам полиция мен жандарм Франциядағы зейнетақы реформасына қарсы Еңбек күніне арналған наразылық акцияларында жарақат алды.
Ішкі істер министрі Жеральд Дарманеннің айтуынша, Парижде 20 тәртіп сақшысы жараланған. Бүкіл ел бойынша 300-ге жуық демонстрант ұсталды.
ІІМ келтірген мәлімет бойынша, Франциядағы шерулерге барлығы 800 мыңға жуық адам қатысқан. Ұйымдастырушылар одан әлдеқайда көп — 2 миллионнан астам деп есептейді және бүкілхалықтық наразылық акциясы деп атады.
Зейнеткерлік жасты 62-ден 64-ке дейін ұлғайтып, бірқатар арнайы зейнетақы режимдерін алып тастайтын зейнетақы реформасы туралы заң күзде күшіне енеді деп күтілуде.
Үкіметтің дауысқа салмай көтерген бастамасы бүкіл елде наразылық пен ереуіл тудырды.
«Біз келіспейтінімізді айта береміз, қайталай береміз», — деді демонстранттардың бірі.
«Зейнеткерлікке шыққанша берілмеймін!» — деді тағы бір Париж тұрғыны.
«Бұл шынымен халық қолдамаған реформа және оны күштеп енгізді. Бұл демократия мен француз халқын қорлау. Барлығы үкіметтің бізге қолданатын шеттетуінен жалықты», — деп айтты басқа демонстранттар.
Кәсіподақтар 1 мамырдағы наразылық шерулерін тарихи деп атады және халықтың ашуы саяси билікке деген сенімнің жоқтығын көрсететін зейнетақы реформасынан асып түседі деп мәлімдейді.
