«Ауыл аманаты» жобасы Шалқар ауылының тұрғыны Әмина Сағатқызы Чокаеваның арманы жүзеге асырылуына себепші болды.
Жеке кәсіпкер «Ауыл аманаты» мемлекеттік бағдарламасына қатысуға өтінім беріп, 5 миллион теңге көлемінде жеңілдікпен несие алған.Осы қаражатқа кәсіпкер Шалқар ауылында бір адамды жұмыс орнымен қамтамасыз етіп, наубайхананы жабдықтап, іске қосты. Отандық кондитерлік өнімдердің дәмін бағалайтын жерлестері мен ауыл тұрғындары бұл бастаманы қолдап отыр.
– 2023 жылы ауданда «Ауыл аманаты» бағдарламасы аясында 30 кәсіпкерге 2,5 пайыз жеңілдікпен жалпы сомасы 171,3 миллион теңгеге несие берілді. Әрбір жоба үшін несиенің орташа мөлшері 5,7 миллион теңгені құрады, – деп атап өтті Целиноград ауданының ауыл шаруашылығы бөлімінің басшысы Нұрлан Дулатов.
Мемлекет басшысы бекіткен «Ауыл аманаты» бағдарламасының мақсаты ауыл тұрғындарын жұмыспен қамту болып табылады. Бағдарлама бірегей, ол бойынша ауыл тұрғындарына 2,5 пайызбен 8 миллион теңгеден астам несие беріледі. Целиноград ауданының жоғары ауылшаруашылығы әлеуетін ескере отырып, оны одан әрі дамытудың жақсы перспективалары бар деуіміз керек.
«Арқа ажарының» өз ақпараты.
