Дархан қазақ даласында бұрын өмірлік тәжірибесі мол, аға буын өкілдерінен құралған ақсақалдар кеңесі болған. Олар дала заңы бойынша ел ішіндегі екеуара, немесе руаралық дау-дамайды әділ шешіп, жанжалдасқан екі тарапты мәмілеге келтіріп, татуластырып, тентекті тезге салып, түзетіп отырған. Онда ақсақалдар халықтың бірлігін сақтап қалуды көздеген.
Қаншама ұлт пен ұлысты бір шаңырақ астында ұйыстырып отырған елімізде қазір де ақсақалдардың үлес салмағы басым. Тәуелсіздік алғаннан бері елімізде қоғамдық институттар көптеп қалыптасты. Солардың бірі – былтырдан бері қолға алынған Ақсақалдар кеңесі. Бірақ, олар бұрынғыдай руаралық немесе екеуара дау-дамайды шешпейді, заманның өзгеруіне, қоғамның дамуына байланысты олардың жұмыс жүйесі басқаша.
Президент Қасым-Жомарт Тоқаев ел ішін аралап, халықпен кездескен сәттерінің бірінде: «Қазақ қай заманда да төрде отырған үлкенді сыйлап, құрмет тұтқан, ақсақалдардың жөнді сөзіне тоқтам жасап, олардың ізіне ерген. Ал, ауызы дуалы қарияларымыз бен ақсақалдарымыз қашанда елдің ұйытқысы болып, татулықты насихаттап, бірлікті сақтап отырған. Ендеше осы үрдісті әлі де жандандырып, бір жүйеге түсіру керек. Бәлкім кеңестерді Ассамблеяның жанына топтастыру керек шығар» деген еді.Міне, Мемлекет басшысының бұл ұсынысы халықтан қолдау тауып, қазіргі таңда барлық аймақта Қазақстан халқы Ассамблеясы жанынан Ақсақалдар кеңесі құрылып, жұмысын бастап кетті. 2023 жылы қаңтар айында Аршалы ауданы әкімінің қаулысымен Ақсақалдар кеңесі құрылды. Биыл сол қаулыға өзгерістер енгізіліп, ақсақалдар алқасының құрамы жаңартылды.
Аудандық Ақсақалдар кеңесінің басты мақсаты – ел бірлігі мен ұлтаралық татулықты нығайту бағытында жұмыс істеп, халықтың жергілікті атқарушы органдар мен қоғамдық ұйымдар арасында туындайтын түсініспеушіліктерін ретке келтіріп, көмек көрсету, консультативті-кеңесші орган қызметін атқару. Бүгінде ауданның Ақсақалдар кеңесінің құрамына 7 адам, яғни, аймақтың құрметті және беделді еңбек ардагерлері енгізілді. Наурыз айында ақсақалдар кеңесінің жаңарған құрамымен аудан әкімі Мұрат Балпан кездесіп, кеңестің бірінші отырысын өткізіп, төрағасын сайлады.
Біздің алдымызға аудандағы басқа қоғамдық ұйымдармен, атап айтқанда,ардагерлер қоғамымен, кәсіподақ ұйымдарымен, жастардың бірлестіктерімен тығыз жұмыс істеп, этносаралық татулық, қайырымдылық бағытында іс-шаралар ұйымдастыру секілді міндеттер қойылды. Сонымен бірге, біздің кеңес мүшелері аудан жастарымен кездесіп, өмірлік тәжірибелерімен бөліседі, оларға дұрыс жол сілтеп, бағыт-бағдар береді, өз елін, тарихын құрметтеуге шақырады, қазақстандық патриотизмді нығайтуға атсалысады, жалпы, қоғаммен билік арасында өзара іс-қимылды қамтамасыз етуге орай жұмыстар атқаратын болады. Аудандық Ақсақалдар кеңесінің келесі отырысын мамыр айының орта тұсына жоспарлап отырмыз.
Владимир БИДЖИЕВ,
Аршалы аудандық Ақсақалдар кеңесінің төрағасы.
