Көкшетау қаласындағы «Мир печати» баспасында жарық көрген «Қарлыкөлдің ағатайы» атты естелік кітабы Ұлы Отан соғысының ержүрек майдангері, ел ардақтысы Бәйкен Иманғожаұлының бір ғасырлық ғибратты ғұмырына арналған.
Табиғаты көркем, жері шұрайлы бұрынғы Көкшетау ауданындағы Қарлыкөл ауылында 1924 жылғы 20 мамырда өмірге келген Бәйкен Иманғожин он алты жасында ауылдық Кеңестің хатшысы, колхоз төрағасы, бөлімше басқарушысы болғанында ел тарихындағы қилы кезеңдерді бастан кешіріп, шыңдалу мектебінен өтті. Ел басқару ісіндегі ұйымдастырушылық қабілеті ескеріліп, 1971 жылы Бұлақ селолық Кеңесінің төрағасы болып сайланды. Бұл қызметті он үш жыл абыроймен атқарып, елді мекендердің әлеуметтік жағдайын жақсартуға елеулі үлес қосты.
Әріптестерінің, ауылдастарының, туыстары мен ұл-қыздарының естеліктерінде ерлі-зайыпты Бәйкен Иманғожаұлы мен Тоты Нарбайқызының іскерлік қабілетіне қоса, адамгершілік қасиеттері жайлы да жылы лебіз білдірілген. Иманғожа ата әулетінің шежіресінен сыр шертетін көне фотосуреттер де талғампаздықпен таңдалған. Бұл орайда, естелік кітапты жазып, шығаруға шығармашылық үлесін қосқан журналисика ардагері Балталы Сәрсенбаевтың да еңбегі алғысқа лайықты.
Асылай ҚАДЫРҚЫЗЫ,
«Арқа ажарының» өз тілшісі.
