Ақмола облыстық мәслихатының депутатыВасилий Шиманский Есіл қаласының бірнеше нысандарына мүмкіндігі шектеулі азаматтардың жүріп-тұруына қандай жағдайлар жасалғандығы жөнінде мониторинг жүргізді.
«AMANAT» партиясы облыстық филиалының отбасы мәселелері және халықты әлеуметтік қорғау жөніндегі қоғамдық кеңесінің төрағасы болып табылатын осы депутаттың мониторинг қорытындыларының негізінде Есіл ауданында Қоғамдық кеңестің көшпелі отырысы болып өтті. Оның жұмысына «АMANAT» партиясы облыстық филиалы төрағасының орынбасары Ақманат Әлімбетова қатысты. Қоғамдық кеңес мүшелері аудан орталығы Есіл қаласындағы мектеп-интернаттың жұмысымен танысты, сондай-ақ, Есіл мен Свободное елді мекендеріндегі балаларды патронаттық тәрбиеге алған бірнеше отбасына барды.
Қоғамдық кеңес отырысында бала тәрбиесімен айналысатын мемлекеттікмекемелерде балаларды оқыту және олардың тұру жағдайлары, Жол картасымен бекітілген 12 нысанның мүмкіндігі шектеулі жандарға арналған бейімдеу жоспары мен«АMANAT» партиясының сайлауалды бағдарламасын іске асыру туралы мәселелер қаралды. Сондай-ақ, балалардың жазғы демалысын ұйымдастыру, соның ішінде оларды жазғы сауықтыру лагерьлеріне жіберу мәселелері де талқыланды. Кеңес мүшелері осы жөнінде мемлекеттік мекемелерге ұсыныстар жолдайтын болды.
Ақмола облыстық мәслихатының баспасөз қызметі.
