Ақмола облысы әкімінің орынбасары Алтынай Әміренованың қатысуымен Көкшетау қаласындағы «Болашақ» сарайында цифрландыру және жасанды интеллект технологияларын енгізу бойынша алғаш рет жасанды интеллект өкілдерінің қатысуымен саммит форматында облыс педагогикалық қызметкерлерінің дәстүрлі тамыз конференциясы болып өтті.
Биылғы жылғы пленарлық отырыстың тақырыбы «DIGITAL Kazakhstan: Жаңа замандағы білім беру» және «Біртұтас тәрбие бағдарламасы» аясындағы тәрбие жұмысына арналды. Ұстаздар өткен оқу жылын қорытындылап, жоспарларымен бөлісті.
«Болашақ» сарайында өңірдің әр өңірінен келген білім саласының қызметкерлері білім беру жүйесіндегі цифрлық технологиялардың әзірлемелері мен жетістіктері таныстырылған «DIGITAL Kazakhstan»: жаңа замандағы білім беру» көрмесін тамашалады. Әрбір жоба өзінше бірегей. Мысалы, балаға арналған ортезді «Болашақ» балалар мен жасөспірімдер сарайының ұстаздар ұжымы құрастырды. Әзірлеушілер жаңашылдықты «Мейкатон TOM: Almaty байқауына ұсынып, онда үшінші орынды жеңіп алған болатын.
– Анасы Мейкатонға жүгінген алматылық церебральды сал ауруына шалдыққан кішкентай Әлияға біздің ұжым көмектесті. Баланың оң қолы туылғаннан бері қозғалмай, сал болып қалған. Ол үшін біз жүйке-бұлшықет пен сүйек жүйесінің құрылымдық және функционалдық сипаттамаларын өзгертуге арналған ортезді – сыртқы медициналық құрылғыны жасадық. Ортезді жобалау кезінде қолдың өлшемдерін алып, құрылғының өлшемдерін анықтап, біз турбокастты, төмен температуралы термопластикті қолданып, сыртынан жұмсақ матамен қаптадық. Қазір қыз бала қолы мен саусақтарын қимылдата алады, заттарды өзі ұстайды, – дейді өндірістік оқыту шебері, «Болашақ» сарайының мұғалімі Әлихан Әминов.
Ортез әзірлеу тобы өз әзірлемелерін өндіріске енгізгісі келеді, бірақ, бұл, әрине, инвесторды қажет етеді. Тағы бір қызықты жайт «SmartOquAI» жобасы – Көкшетау қаласындағы №11 мектеп-гимназиясы ұжымының мұғалімдерге арналған жазғы мектеп аясында әзірлеген білім беру ресурсы.
– Осы жобаның арқасында біздің мұғалімдеріміз аналитикалық ойлау, бағдарламалау және технологиялық сауаттылық дағдыларын меңгереді. Білім беру ресурсы сабақтарды түрлендіріп, оқушылардың қызығушылығын арттыруға мүмкіндік берді. Біздің платформаның арқасында әдеттен тыс презентациялар мен тапсырмаларды жасай отырып, мұғалімдер сол немесе басқа материалды іздеуге уақыт жұмсамайды, студенттеріне де көбірек уақыт бөледі. Сондықтан, уақыт өте келе біздің білім ресурсы облыстағы басқа мектептерде де танымал болады, – деген ойымен бөлісті №11 мектеп-гимназиясының информатика пәнінің мұғалімі Әсемгүл Сүндетова.
Пленарлық отырысқа облыс әкімінің орынбасары Алтынай Әміренова, Қазақстан Республикасы Білім министрлігі мектепке дейінгі білім департаментінің директоры Манара Адамова, облыс әкімдігі мен білім басқармаларының өкілдері, мұғалімдер, әдіскерлер мен тәрбиешілер қатысты. Сонымен қатар, Түрік Республикасының Қазақстандағы Елшілігінің білім жөніндегі кеңесшісі Омер Инан, халықаралық «Global Sapa» академиясының негізін қалаушы Тілектес Шыңғожинова, Вебстер университетінің ректоры, арнайы кафедраның доценті, инклюзивті білім беруші Стефани Махфуд (АҚШ) сынды халықаралық қонақтар да шақырылды.
– Мемлекет басшысы ұстаздың қоғамдағы маңызды рөлін, оқыту мен тәрбиелеуде мұғалім ең маңызды әрі анықтаушы буын екенін үнемі атап көрсетеді. Сіздердің жоғары кәсіби қызметтеріңіз бен белсенді азаматтық ұстанымдарыңыздың арқасында біз білім саласының жүйелі жұмысын және алға қойған мақсат-міндеттеріміздің орындалуын қамтамасыз ете алдық, – деді облыс әкімінің орынбасары Алтынай Әміренова.
Түрік Республикасының Қазақстандағы елшілігінің білім жөніндегі кеңесшісі Омер Инан екі мемлекеттің білім беру саласындағы атқарылған жұмыстары мен жетістіктеріне тоқталды. Қазақстан мен Түркия арасында білім беру саласында 18 келісімге қол қойылды. Сондай-ақ, 2024 жылғы 10 мамырда күшіне енген екі елдің мектеп басшылары мен мұғалімдері арасында білім беру технологиялары саласындағы оқу материалдары мен тәжірибе алмасуды көздейтін Үкіметаралық келісім жасалғанын да атап өтті.
Сондай-ақ, екі ел арасындағы студенттік ұтқырлық бағдарламалары мен студенттік гранттар талқыланды. «Global Sapa» халықаралық академиясының негізін қалаушы, Қазақстан Республикасы білім беру ісінің еңбек сіңірген қызметкері Тілектес Шыңғожинова озық тәжірибені ұсынатын инклюзивті білім берудің халықаралық тәжірибесіне тоқталды.
Вебстер (АҚШ) университетінің ректоры, арнайы кафедраның доценті Стефани Махфуд университеттің көпсалалы зерттеулер факультетіндегі оқу бағдарламасы туралы айтып берді. Ол сонымен қатар, арнайы инклюзивті білім беру саласындағы мамандарды сертификаттау бағдарламасының үйлестірушісі болып табылады.
– Мемлекеттің басты міндеттерінің бірі – бәсекеге қабілетті жеке тұлға тәрбиелеу. Балаларды ерте жастан дамыту – мемлекеттің болашағына қосылған үлес, – деп атап өтті өз сөзінде облыстық білім басқармасы басшысының міндетін атқарушы Айнагүл Балташева.
Қала, аудан, ауыл мектептерінде қызмет ететін мұғалімдер озық әзірлемелерін көрсетіп, тәжірибелерімен бөлісті. Мәселен, Астрахан ауданының орталығы Астрахан ауылындағы №2 жалпы білім беретін мектептің тарих пәнінің мұғалімі, «Дарынды балаларға арналған дарынды мұғалім» республикалық педагогикалық олимпиадасының жеңімпазы Шәміл Зәйкенов тарих пәнінен жасанды интеллект пен нейрондық желілерді қолдану арқылы сабақ берудегі әдіс-тәсілдерін таныстырды.
– Тарих пәнінен сабақ беру барысында мен бір мәселеге тап болдым. Бізде жазбаша мәтін тым көп, оны көрнекі құралдарсыз балалардың қабылдауы қиын. Осы тұрғыда соңғы технологиялар бізге көп көмек болды. Жасанды интеллект пен нейрондық желілер бүгінгі күнге дейін сақталған кез-келген ақпаратты жазбаша әрі көрнекі түрде бейнелеуге көмектеседі, – дейді ол.
Тамыз конференциясының соңында білім беру жүйесіндегі көп жылғы адал еңбектері үшін бірқатар ұстаздар министрліктің «Еңбек ардагері» медалімен және «Ыбырай Алтынсарин» төсбелгісімен марапатталды. Сондай-ақ, жалпы білім беретін пәндер негізінде оқушыларға арналған республикалық олимпиаданың қорытындысы бойынша «Елдегі 100 үздік олимпиадалық мектеп» рейтингіне енген облыс мектептеріне де марапаттар табыс етілді. Олардың қатарында Көкшетау қаласындағы «Білім-Инновация» лицей-интернаты, №5 «Таңдау» көпсалалы гимназиясы, №13 «ЭКОС» мектеп-гимназиясы және Щучинск қаласындағы «Білім-Инновация» IT лицей-интернаты бар. Білім беру мекемелерінің басшылары10 миллион теңгенің сертификаттарына ие болды.
Сондай-ақ, облыстағы білім беру мекемелері арасындағы жұмыстардың қорытындысы шығарылды. Үздік орта білім беру ұйымы деп танылған Целиноград ауданы, Родина ауылындағы орта мектеп 22 миллион теңге грантқа ие болды. Техникалық және кәсіптік орта білімнен кейінгі білім беретін үздік ұйым Краснояр ауылының көпсалалы инновациялық колледжіне 20 миллион теңге грант табыс етілді.
Тамара САЛИМОВА,
Асылай ҚАДЫРҚЫЗЫ.
