Ақмола облыстық сотының әкімшілік істер жөніндегі сот алқасы жер теліміне құқықты қайта ресімдеу жөніндегі аудан әкімдігінің қаулысын заңсыз деп тану және оның күшін жою туралы Т.-ның талабын қарады.
Алқаның қаулысымен талап қанағаттандырылып, әкімдіктің қаулысы заңсыз деп танылып, күші жойылды. Істі қарау барысында алқа іс бойынша елеулі маңызы бар мән-жайларды анықтау үшін даулы жер теліміне қатысты іс материалдарында жоқ мәліметтерді талап ете отырып, аудан әкіміне соттың сұрау салуын жолдады. Әкім сот сұрауын уақытылы алған, бірақ, сот белгілеген мерзімде оны орындамаған және орындау мерзімін ұзарту жөнінде алқаға жүгінбеген. Соттың сұрау салуын орындамағаны жауапкердің іс жүргізу құқығын теріс пайдаланғанын айғақтайды. Осыған байланысты облыстық сот алқасының ұйғарымымен аудан әкіміне 20 АЕК (73 840 теңге) мөлшерінде ақшалай өндіріп алу шарасы қолданылды. Сот актісі заңды күшіне енді.
Ақмола облыстық сотының баспасөз қызметі.
