Ақмола облысы әкімінің 2024 жылғы 13 қарашадағы өкімімен Қазақстан Республикасы Президенті Әкімшілігінің келісімі бойынша және мәслихат депутаттарының мақұлдауымен Гайдар Қасенов Степногорск қаласының әкімі болып тағайындалды.
Степногорск қаласының жаңа әкімін қала активіне облыс әкімінің бірінші орынбасары Елдос Рамазанов таныстырды. Ол қаланың бұрынғы әкімі Алпысбай Қайыржановқа алғысын білдіріп, жаңа әкімге жұмысында сәттілік тіледі.
Мемлекет басшысының тапсырмасын іске асыруда Гайдар Қасеновке қаланы дамыту және тұрғындарға қолайлы жағдай жасау бойынша бірқатар міндеттер жүктелді.
– Бүгінгі қысқы жылыту маусымында қала әкімі үшін ең басты міндет – халықты және әлеуметтік нысандарды жылумен үздіксіз және тұрақты қамтамасыз ету. Сондай-ақ, сумен жабдықтау нысандарының жұмысын аяқтау және оларды уақытында іске қосу ерекше бақылауда болуы қажет, – деп атап өтті Е.Рамазанов.
Сонымен қатар, Степногорск қаласының әкімдігіне инвестиция тарту, жаңа жұмыс орындарын құру, кәсіпкерлікті дамыту және тұрғын үй құрылысы бойынша нақты жұмыстар жүргізу тапсырылды.
Ақмола облысы әкімінің баспасөз қызметі.
