Астана қаласында еліміздің ауыл мектептерінің 9-11 сынып оқушылары арасында жаратылыстану-математикалық бағытында жалпы білім беретін пәндер бойынша республикалық олимпиаданың республикалық кезеңі өтті.
Олимпиаданың негізгі мақсаты – ауылды жерлердегі мектеп оқушыларының талап-дарынын анықтау және оларға қолдау көрсету, неғұрлым академиялық қабілетті оқушыларды табу, олардың зияткерлік дамуы мен кәсіби бағдарлануына жағдай жасау. Олимпиаданың республикалық кезеңінде еліміздің әр өңірінен келген 500-ге жуық оқушы бас қосты. Ақмола облысынан олимпиадаға облыстық кезеңнің 23 жеңімпазы қатысты. Шара қорытындысы бойынша өңірдің 14 оқушысы жүлдегерлер қатарынан көрініп, біреуі І дәрежелі, бесеуі ІІ дәрежелі, сегіз оқушы ІІІ дәрежелі дипломмен марапатталса, үш бала грамоталарға ие болды. Сөйтіп, ақмолалық оқушылар командалық есепте «Ең үздік олимпиадалық команда-2024» аталымында ІІ дәрежелі дипломға қол жеткізді.
«География» пәні бойынша Олимпиаданың алтын медалімен Зеренді ауданы Зеренді ауылының №2 жалпы орта білім беретін мектебінің 9-сынып оқушысы Каргин Захар марапатталды. Қалған жүлдегерлердің есімдері жазылған толық тізім Ақмола облысы білім басқармасының ресми сайтында жарияланды.
«Арқа ажарының» өз ақпараты.
