Көкшетау қаласындағы «Салтанат сарайы» жанындағы қалалық үлгілі кітапханасы «Кітапхана және жастар» жобасы аясында «Көкшетау – жыр құшағында» атты мәнерлеп өлең оқу байқауын өткізіп, шығармашылық жастардың талабы мен талантын ұштауға өз үлестерін қосты.
Шараның басты мақсаты – қазақ елінің ғаламдық өркениет пен мәдениет биігінде алар орнын жырға қосу арқылы көкшелік ақындардың шығармашылығын насихаттау, ел ертеңі саналатын жастардың бойында патриоттық сезімдерін оятып, бейбітшілік пен берекелі өмірдің мән-маңызына өлең тілінде бойлату, ақын жанды жастардың шығармашылығын қолдап, кітап оқуға құмар жасөспірімдердің қатарын қалыптастыру. Тартымды да тартысты өткен жыр додасында Көкшетау қаласының жеті арнаулы орта білім беретін оқу орнынан 27 үміткер қатысып, бақ сынады және Көкше еліне деген сүйіспеншіліктерін жергілікті ақындардың өлеңдері арқылы жеткізді.
Шараға Көкшетау қаласының мәдениет, тілдерді дамыту, дене шынықтыру және спорт бөлімінің басшысы Күнім Оразбаева, «Аmanat» партиясының Ақмола облыстық филиалының атқарушы хатшысының орынбасары Ақманат Әлімбетова, Қазақстан халқы Ақмола ассамблеясы жанындағы Аналар кеңесінің төрайымы Айнұр Жахина, бұқаралық ақпарат құралдарының өкілдері қатысты. Байқауға белгілі қоғам қайраткері, тіл және мәдениет жанашыры, қаламгер Қаратай Төлекеев бастаған қазылар алқасы қазылық етті.
Байқау қорытындысы бойынша бас жүлдені Ақан сері атындағы жоғары мәдениет колледжінің студенті Жанболат Шрайденов жеңіп алды. І дәрежелі диплом жоғары техникалық колледжінің студенті Талғат Алдиярға, Ш.Уәлиханов атындағы Көкшетау университеті жанындағы көпсалалы колледжінің студенті Мөлдір Әбішке бұйырды. ІІ дәрежелі дипломға Ақан сері атындағы жоғары мәдениет колледжінің студенттері Жанұзақ Айбар, Бибінұр Қайырбекқызы, Қазақстан Республикасы Төтенше жағдайлар министрлігінің Мәлік Ғабдуллин атындағы Азаматтық қорғау академиясының курсанты Диас Тұрарбек, Ш.Уәлиханов атындағы Көкшетау университеті жанындағы көпсалалы колледжінің студенті Анажан Бөкен ие болды. ІІІ дәрежелі дипломдар Ж.Мусин атындағы Көкшетау жоғары қазақ педагогикалық колледжінің студенті Гүлден Сақтағанға, Ш.Уәлиханов атындағы Көкшетау университеті жанындағы көпсалалы колледжінің студенттері Айзат Қалиеваға, Ботагөз Күнтуғанға, Дарина Сейтімбетоваға, Ақан сері атындағы жоғары мәдениет колледжінің студенті Мұхамедали Оспановқа табысталды. Жүлделі орын алған жеңімпаздарға бағалы сыйлықтар беріліп, байқауға белсене қатысқан жастар мен ұстаздарға Алғыс хаттары табыс етілді.
Байқау барысында қатысушылар назарына «Көкшетау – жыр төресі» тақырыбында кітап көрмесі ұсынылып, «Достар» мәдениет сарайының өнерпаздары менстудент жастар әзірлеген музыкалық бағдарлама тамашаланды.
Шараны ұйымдастыруға демеушілік жасаған «Қараөзек» агрофирмасының директоры Нартай Ысқақов пен Көкшетау қаласының жастар ресурстық орталығының директоры Ерден Нұрмұхаметке, мәнерлеп өлең оқу байқауына сайыскер дайындап, көкшелік ақындардың шығармашылығын насихаттауға, поэзияны сүйетін, кітап оқуға құмар жастарды қалыптастыруға үлес қосқан ұстаздарына, шараның шырайын келтіріп әннен шашу шашқан өнерпаздарға кітапхана ұжымы алғысын білдіреді.
Бақытжан АЙДОСОВА,
«Салтанат» сарайы жанындағы Көкшетау қалалық үлгілі кітапханасының меңгерушісі.
