Мемлекет басшысы Қасым-Жомарт Тоқаев «AMANAT» партиясының кезектен тыс съезінде қоғамдық қабылдаулардың маңызды екеніне тоқталып, азаматтармен кездесудің тиімділігін арттыруды тапсырған еді. Аталған тапсырманы орындау мақсатында партияның қоғамдық қабылдау бөлмелері жұмыс істеудің жаңа тәсіліне көшіп, ел ішіне мобильді қоғамдық қабылдау бөлмелері шығып тұруды дәстүрге айналдырды. Кеше мұндай қабылдау бөлмелері Қорғалжын ауданының екі ауылына аттанды.
Алғашқы қабылдау Арықтыда өтті. Көшпелі мобильдік қабылдауды Қорғалжын ауданына бастап барған облыстық партия филиалы атқарушы хатшысының орынбасары Ақманат Әлімбетованың айтуынша Қорғалжын ауданында өткен қабылдау кезінде 50-ден астам адамның арыз-шағымы тыңдалды. Халықтың арыз шағымын тыңдауға заңгер, адвокат, облыстық «Жер аманаты» комиссиясы төрағасының орынбасары Асқар Әміржанов, Қорғалжын аудандық мәслихатының депутаттары – партия фракциясының мүшелері, қоғамдық кеңестер мен мемлекеттік органдардың өкілдері қатысты. Қабылдауға келген Қорғалжын ауданына қарасты Арықты ауылының тұрғыны Ержан Сүлейменов елді мекенді сумен жабдықтау мәселесін көтерді. Ауылға дейін құбыр тартылды, алайда үйлерге әлі су кірмегендігін жеткізді. Көшпелі қоғамдық қабылдауда аудандық тұрғын үй коммуналдық шаруашылығы бөлімінің басшысы Мейірболат Рақымов ауылдағы сумен жабдықтау желілерін тарту жұмыстары биыл басталуы тиіс екенін тілге тиек етті. Сонымен бірге ауыл азаматтары ауылға мәдениет үйін салу, жайылымдық жер беру, көшелерді жарықтандыру, жолдарды жөндеу, инженерлік желілер мен әлеуметтік инфрақұрылымға қатысты да бірқатар мәселе көтерді. Кәсібін ашамын деген азаматтар «Ауыл аманаты» бағдарламасының жай күйін сұрап білді. Аудан әкімнің орынбасары Дархан Бейсенбеков «Тұрғындардың әрбір өтініші бойынша жауапты тұлғалар мен орындау мерзімі белгіленеді»,- деп жауап берді.
«AMANAT» партиясы Ақмола облыстық филиалы атқарушы хатшысының орынбасары Ақманат Әлімбетованың айтуынша, мобильді қоғамдық қабылдаудың тиімділігі – өтініш арқалағандарды орталыққа сабылтпау. Тұрғындардың талап-арызын тыңдауға енді қоғамдық қабылдаудың өкілдері өздері барады. Себебі шалғай ауылдарда шешімін таппаған мәселе көп .
Түс ауа көшпелі мобилдік қабылдау өз жұмысын Қорғалжын ауылында жалғастырды. Аудан орталығында хирург, терапевт мамандарына кіру ұзын сонар кезекке айналатындығын жеткізіп, жайылымдық жер алу, кәсіп ашуға жеңілдетілген несие алу сұрақтарымен жүгінген ауыл азаматтары қабылдау кезінде өз сұрақтарына толық жауап алды.
Жалпы, «AMANAT» партиясының Ақмола облыстық филиалының қоғамдық қабылдауларына жыл басынан бері 1480 адам жүгінген. Осы мәселелердің 51 пайызы оң шешілді. Көшпелі кездесуден кейін арызданушылар саны анағұрлым артуы мүмкін. Өйткені бұған дейін орталыққа келіп өтінішін айта алмағандар мобильді қабылдаудың мүмкіндігін пайдалануға асығары сөзсіз. Көшпелі кездесудің артықшылығы да осы. «Шалғай елді мекендердің тұрғындары партияның аудандық немесе облыстық филиалына әрдайым келе алмайды. Оларға мәселені облыстық мәслихаттағы партия фракциясының депутаттарына жеткізу қиын. Сондықтан құрамына филиал қызметкерлерінен басқа мәслихат депутаттары, өңірлік Саяси кеңес мүшелері, мемелкеттік орган жетекшілері, заңгер, адвокат, медиаторлар кіретін мобильді қоғамдық қабылдаудың тиімділігі көп», – деген Ақманат Әлімбетова көшпелі қоғамдық қабылдаулар жыл бойы жалғасатынын жеткізді.
