Наурыз мейрамында екінші дүниежүзілік соғыстың от-жалынында шыңдалған Арсений Андреевич Щудляк өзінің ғасырлық мерейтойын атап өтті. Щучинск қаласында өткен салтанатты шарада майдангерді құттықтау әскери оркестрдің сүйемелдеуімен іске асты.
Ақмола облысының әкімі Марат Ахметжанов Қазақстан Республикасының Президенті Қасым-Жомарт Кемелұлы Тоқаевтың құттықтау хатын оқып, ардагердің Ұлы Жеңіске қосқан өлшеусіз үлесі мен еліміздің болашағы үшін жасаған ерлігіне терең алғыс білдірді.
Арсений Андреевич Щудляк 1925 жылы 22 наурызда Украин КСР-нің Каменец-Подольск облысы, Карытно ауылында дүниеге келген. 1935 жылы отбасымен бірге Қазақстанға қоныс аударған. 16 жасында ағаш ұстасының шәкірті болып еңбек жолын бастады, ал, 1943 жылдың ақпанында, 18 жасқа толғанда әскерге шақырылды.
Ол 127-атқыштар полкінде қызмет етіп, соғысты басынан аяғына дейін өтті. 1945 жылдың тамыз-қыркүйек айларында жапон әскерімен шайқастарға қатысты. Одан әрі де 1945 жылдың қарашасынан 1946 жылдың наурызына дейін 18-мотоатқыштар бригадасында қызметін жалғастырды.
Ерлігі мен Отанға адалдығы үшін II дәрежелі «Отан соғысы» орденімен, Георгий Жуков медалімен, «Германияны жеңгені үшін», «Жапонияны жеңгені үшін» медальдарымен, сондай-ақ, «КСРО Қарулы Күштеріне 60 жыл» мерейтойлық медалімен марапатталды.
Соғыстан кейін Арсений Андреевич Щучинск қаласындағы теміржол әскери күзетінде қарауыл бастығы болып жұмыс істеді. 1985 жылы құрметті демалысқа шықты.
Бүгінде мерейтой иесі жақындарының қамқорлығы мен сүйіспеншілігіне бөленуде. Ол – үш баланың әкесі, алты немеренің және тоғыз шөберенің ардақты атасы.
Ақмола облысы әкімінің баспасөз қызметі.
Бурабай ауданы.
