Жақсы ауданында дәрігерлер трактордың астына түскен науқастың өмірі үшін жеті сағат бойы арпалысып, аман алып қалды.
Жуырда осы ауданда оқыс жағдай орын алды. Новокиенка ауылында жұмысшы трактордың астына түсіп, мертігіп қалды. Политравма диагнозымен ауыр халге тап болған науқасты ақ халаттылар жедел жәрдеммен аудандық ауруханаға жеткізді.
Пациент түскен сәттен кейін әрбір минут санаулы еді. Ер адамның денсаулық жағдайы өміріне қауіпті деп танылған сәттен бастап, оған дәрігерлер жан сақтау бөлімінде дереу диагностика қойып, қажетті ем-дом шараларын жүргізді. Хирургтер қан кетуді тоқтатып, бауырын тікті. Сонымен қатар, өкпенің жұмысын қалпына келтіру үшін плевра қуысына дренаж орнатылды. Сонымен қатар, сыртқы бекіту аппаратының көмегімен жамбас сүйектері тұрақтандырылды.
Осындай жедел әрекеттердің арқасында пациентті жансебіл күйден шығарып, жағдайын бірқалыпты ұстау мүмкін болды. Алайда, жарақаттардың ауырлығы келесі, бұдан да күрделі кезеңді — жамбас сүйектерін толық орнына келтіруді талап етті.
Әдетте, мұндай күрделі деңгейдегі оталар тек облыстық орталықтарда немесе республикалық институттарда жасалады. Бірақ, пациенттің жағдайына байланысты шұғыл көмекті дәл сол жерде көрсетуден басқа амал жоқ еді.
Травматология институтының мамандарымен телемедицина арқылы өткізілген консилиумнан кейін Жақсы аудандық ауруханасының дәрігерлері батыл шешім қабылдады. Қашықтықтан кураторлық бақылау арқылы отаны өздері жасауға бел байлады.
Бұл күрделі ота аудан тарихында тұңғыш рет жасалды. Бес маманнан тұратын бригада 7 сағат бойы жамбас сүйектерін қайта жинап шықты. Бұл жоғары шеберлік пен зор жауапкершілікті талап ететін өте нәзік жұмыс болды.
Бүгінгі таңда дәрігерлердің нағыз керемет ота жасағанын айтуға болады. Пациенттің жағдайы тұрақты, орташа ауыр дәрежеде деп бағалануда. Ең бастысы, ер адамның қимыл-қозғалыс белсенділігі қалпына келді.
Қайғылы жағдайдан сәтті айығу медицина қызметкерлерінің үйлесімді жұмысының, заманауи телемедицина технологияларының және жергілікті дәрігерлердің ең қиын сәтте жауапкершілікті өз мойнына алуға дайындығының арқасында мүмкін болды. Бұл оқиға сапалы және жоғары технологиялық медициналық көмектің облыстың шалғай аудандарында да қолжетімді болып келе жатқанының тағы бір дәлелі.
Бейбарыс ШАЛАБАЕВ,
«Арқа ажарының» өз тілшісі.
