14 тамыз – Қазақстан Республикасы мемлекеттік кірістер органдарының құрылған күні
Мемлекеттік кірістер органдарындағы жұмыс ерекше жауапкершілікті жүктейді, өйткені, ол мемлекеттің экономикалық тұрақтылығымен, бизнестің дамуымен және азаматтардың әл-ауқатымен тікелей байланысты.
Мемлекеттік кірістер органдарының қызметкерлері мемлекеттің аса маңызды міндеттерінің бірін – бюджетке кіріс түсіруді және салықтық міндеттемелердің адал орындалуына жағдай жасауды қамтамасыз етеді. Ақмола облысы бойынша мемлекеттік кірістер департаментінің 2026 жылғы жеті айдағы жұмыс нәтижелері бойынша мемлекеттік бюджетке 453 миллиард теңгеден астам қаражат аударылды.
Статистикалық көрсеткіштердің артында нақты адамдар мен олардың қажырлы еңбегі тұр. Әрбір салық төлемі мектептер мен ауруханалардың салынуына, жолдар мен инфрақұрылымның дамуына, әлеуметтік бағдарламалар мен экономикалық қолдауға, сондай-ақ, елдің одан әрі ілгерілеуіне жол ашатын мүмкіндіктерге айналады.
Дәл сол себепті мемлекеттік кірістер органдарының жұмысы стратегиялық маңызға ие. Әрбір қызметкердің кәсібилігі, адалдығы мен жауапкершілік сезімі тек бюджеттің толықтырылуын ғана емес, сонымен қатар, азаматтар мен кәсіпкерлердің мемлекетке деген сенім деңгейін де айқындайды.
2026 жыл Қазақстан үшін жаңа кезеңнің бастауы болды. 1 қаңтарда жаңа Салық кодексі, ал, 1 шілдеде Қазақстан Республикасының жаңа Конституциясы күшіне енді.
Біз салық төлеушілердің өз салықтық міндеттемелерін түсінуін, қажетті кеңес алуын және мәселелердің басым бөлігін жедел әрі ыңғайлы шешуін қамтамасыз етуге ұмтыламыз. Сондықтан, біздің міндетіміз – тек заң бұзушылықтарға ден қою ғана емес, сонымен қатар, олардың алдын алу.
Ақмола облысында бұл жұмыс жүйелі түрде жүргізілуде. Біз кәсіпкерлермен, бухгалтерлермен, қоғамдық ұйымдармен, кәсіби бірлестіктермен және бұқаралық ақпарат құралдарымен белсенді түрде өзара іс-қимыл жасаймыз.
Ашық диалогтың бір мысалы — «Халық бухгалтері» бастамасы. Осы бастама аясында 800-ден астам салық төлеуші кәсіби бухгалтерлерден, аудиторлардан және мемлекеттік кірістер органдарының мамандарынан кеңес алу мүмкіндігіне ие болды.
Бұл формат маңызды жайтты көрсетеді. Мемлекет пен бизнес қоғамдастығы арасындағы ашық әрі кәсіби диалог салықтық сауаттылықты арттыруда және құқық бұзушылықтардың алдын алуда тиімдірек нәтиже береді.
Электрондық қызметтер салық органына бармай-ақ ақпарат алуға, есептерді тапсыруға, міндеттемелерді бақылауға және көптеген мәселені шешуге мүмкіндік береді.
2026 жылдың бірінші жартыжылдығында Ақмола облысы бойынша мемлекеттік кірістер департаменті 220167 мемлекеттік қызмет көрсетті, олардың 99,9 пайызы электронды түрде ұсынылды.
Мемлекеттік басқару саласында аналитика, автоматтандыру және тәуекелге негізделген тәсілдердің маңызы артып келеді. Ұлттық деңгейде ISNA, KEDEN және Smart Data Finance жүйелерін қамтитын салықтық әкімшілендірудің жаңа цифрлық экожүйесі әзірленуде. Бұл құралдар жиынтығы салықтық процестер мен мемлекеттік қызметтердің кең ауқымын қамтиды.
Қазақстанның салық жүйесін дамытудың жаңа кезеңі жұмысымызға жаңаша көзқараспен қарауды және кәсіби тұрғыдан үздіксіз жетілуді талап етеді. Дегенмен, жұмысымыздың іргелі қағидаттары заңдылық, әділдік, объективтілік және жауапкершілік өзгеріссіз қалады.
Кез келген реформа, ақпараттық жүйе немесе заманауи технология тек кәсіби команданың қолдауымен ғана тиімді нәтиже береді. Мен осы ретте, ардагерлерімізге ерекше алғыс білдіргім келеді. Олар қызметтің кәсіби дәстүрлерін қалыптастырып, білімдерімен және тәжірибелерімен бөлісті әрі мамандардың бірнеше буынына тәлімгерлік етті.
Бүгінгі таңда Ақмола облысы бойынша мемлекеттік кірістер департаментінің қызметкерлері алдында заңдылық, әділдік, объективтілік және ашықтық қағидаттарын одан әрі нығайту міндеттері тұр. Заң бұзылған жағдайда біз қатаңдық танытуымыз керек, ал, азаматтарға өз міндеттемелерін орындауда көмек қажет болған кезде барынша түсінікті әрі қолжетімді болуымыз қажет.
Осы кәсіби мереке үстінде Ақмола облысы бойынша мемлекеттік кірістер департаментінің барлық ұжымына зор денсаулық, отбасы амандығын, кәсіби табыс және жаңа жетістіктер тілеймін!
Дулат НҰРМОЛДИН,
Ақмола облысы бойынша мемлекеттік кірістер департаментінің басшысы.
