Ақмола облыстық халық шығармашылығы орталығында Елбасы Нұрсұлтан Назарбаевтың Қазақстан халқына арнаған Жолдауын облысымыздың мәдениет саласының қызметкерлері де тікелей эфирден тамашалап, тың бастамаларға қолдау білдірді.
Өңіріміздің өнерін өрге домалатып, өркендетіп жүрген мәдениет саласының қызметкерлері Президенттің жаңа Жолдауындағы көтерілген бастамаларды зор ықыласпен қабылдады. Әсіресе, халықтың әлеуметтік жағдайын көтеруге бағытталған игі іс-шараларға ризалықтарын білдірді.
Қазіргі таңда облысымыздың мәдени ошақтарында үш мыңнан аса мәдениет қызметкерлері еңбек етеді. Жыл сайын саланы қаржыландыру мәселесі де қарқын алып келеді. Осы орайда, өнерді дамыту, өнерпаздарды қолдау, мәдениет саласындағы нысандардың материалдық-техникалық базасын нығайту, басқа да мән-маңызы жоғары мәдениет саласындағы өзекті мәселелерге соңғы жылдары зор көңіл бөлініп жатқандығын айта кетсек орынды болар.
Қазақстан Республикасының Президенті Нұрсұлтан Әбішұлы әрқашанда елінің болашағы мен ертеңін көрегендікпен болжау арқылы, дұрыс бағыт-бағдар беріп отыратындығы ақиқат. Терең мағынаға ие әрбір жаңа Жолдау – ең алдымен егемен еліміздің ертеңгі жарқын болашағына бастар басты бағыт, баянды бағдар. Биылғы Жолдауда экономиканы қарқынды түрде технологиялық жаңғырту, дәстүрлі негізгі салаларды дамыту, еңбек нарығын жаңғырту, макроэкономикалық тұрақтылық, адами капиталдың сапасын көтеру, институционалдық түрлендіру, қауіпсіздік, сыбайлас жемқорлықпен күрес мәселелеріне ерекше назар аударылды. Бұл жаңа заман талабына сай экономикалық жаңа өзгерістерге қабілетті жаңа Қазақстанды қалыптастыру мақсатынан туындап отырған міндеттер болып табылады.
Эфир арқылы осыны терең сезінген мәдениет қызметкерлері Жолдаудан алдағы атқаратын жұмыстарға негіз болар жаңа ойлар түйді.
«Арқа ажарының» өз ақпараты.
