Мемлекет басшысы Н.Ә.Назарбаев өзінің кезекті Жолдауын қазақстандықтарға жария етті. Бұл жолғы құжат еліміздің әлеуметтік-экономикалық дамуының өзекті мәселелеріне және қазақстандықтардың әл-ауқатын одан әрі арттыру міндеттеріне арналды.
Өз елімнің болашағына бейқам қарамайтын адам ретінде биылғы Жолдауды зер сала тыңдадым. Онда Елбасы батыл қадамдардың кезі келгенін айтып, атқарылатын жұмыстарды, нақты міндеттерді айқындап берді.
Қазақстанда жыл сайын 6 миллион шаршы метрден астам тұрғын үй пайдалануға беріліп келеді. Жолдауда ең алдымен, осы тұрғыда «Нұрлы жер», «7-20-25» мемлекеттік бағдарламалары арқылы халықты баспанамен қамтамасыз ету туралы мәселе көтерілді. Бұл әрине пәтер жалдап жүрген жас отбасылар үшін қуантарлық жайт. Оған қоса, келер жылы «Жастар жылы» деп белгіленуі тіптен жақсы.
Осындай қиын кезеңде мемлекет тарапынан көрсетілген көмек пен бастама ел жастарын жігерлендіретіні анық. Біз Мемлекет басшысын әрқашанда қолдаймыз. Еліміздің дамуына өз үлесімізді қосуға ынталымыз. Қазақ елі көптеген қиын-қыстау кезеңдерді бастан кешіріп, экономикасын жоғары деңгейге көтерді. Ендігі мақсат ел экономикасын одан әрі нығайтып, халықтың әл-ауқатын арттыруға қол жеткізу. Бұған жететіндігімізге сенім мол.
Ел үшін сын кезеңде жастарына жағдай жасап отырған Елбасының үмітін ақтап, ел сенімінен шығудың жауапкершілігін түсінуіміз керек.
Нұрлан ЫСМАЙЫЛОВ,
бухгалтер.
Атбасар ауданы.
