Аудандық прокуратураның тексерістерінің нәтижесінде өткен айдың өзінде бірқатар серіктестіктер жұмысшыларға 19 миллион 895 мың теңге қарыз екені анықталды.
Мәселен, «Агроцентр-Ақмола-Техсервис» жауапкершілігі шектеулі серіктестігі үстіміздегі жылдың алғашқы екі айында 71 қызметкерге еңбекақыларын төлемесе, «Атбасарка Нива» серіктестігі де 400 адамға 10 миллион теңгеге қарыз екені белгілі болды. «Агроцентр Астана» шаруашылығында да осындай заң бұзушылықтар тіркелді. Прокурорлық ықпал ету шараларының нәтижесінде аталған кәсіпорындар 118 қызметкерге 7 миллион 82 мың теңге қарызын өтеді.
Одан басқа «Атбасарские мельницы» жауапкершілігі шектеулі серіктестігі қызметкерлерінің өтініштері бойынша осы мекемеде тексерістер жүргізіліп, жұмысшылардың құқықтары қорғалды. Қызметкерлерге еңбекақыларын уақытында төлемегені үшін аталған серіктестік директоры Ж.Абдұлғапарова әкімшілік жауапкершілікке тартылды.
Дархан АМАНБАЙ,
Атбасар ауданы прокурорының
әділет кеңесшісі.
