Өткен жылы Есіл қаласында жаңа жылу электр орталығы пайдалануға беріліп, қыс айларында әлеуметтік нысандар мен көпқабатты тұрғын үйлерді жылумен ойдағыдай қамтамасыз етті.
Осының арқасында қала бойынша төрт бу қазандығы қысқартылған болатын. №7 агротехникалық колледждің түлегі, кәсіпорынның кезекші операторы Альфред Бикбаевтың айтуынша, жылу құбырының ұзындығы 40 шақырымды құрайды. Жылу электр орталығында жылу беру үрдісін компьютермен басқаратын барлық жүйе автоматтандырылған. Ыстық су айналымы мен қысым пультпен автоматты түрде реттеледі. Өткен қыс аязды болды. Дегенмен, қаладағы әлеуметтік нысандар мен тұрғын үйлерде тұрақты температура сақталды.
Кәсіпорында Павлодар техникалық колледжінің түлегі Евгения Горбач қондырғыларды жөндейтін кезекші слесарь болып еңбек етеді. Бұған дейін ол № 1, № 6 бу қазандықтарында слесарь, ж
ергілікті темір жол станциясында вагон жуушы болып жұмыс істеген. Өзге жылу беретін нысандарда мол тәжірибе жинақтапты. Кәсіпорын ұжымы қаланың жаңа жылу электр орталығы биылғы қыста да апатсыз жұмыс істейтініне сенімді. Ол үшін тиісті жұмыстар атқарылып, қысқы жылу беру маусымына алдын ала тиянақты дайындық жасалуда.
Төлеген ҚОСШЫҒҰЛОВ.
Суреттерді түсірген автор.
Есіл ауданы.
