Облыстық соттың ғимаратында «Салық және кеден ұйымдарының іс-әрекетіне шағымдану. Мемлекеттік ұйымдармен сотқа дейінгі дауларды реттеу» тақырыбына өңірлік семинар мәжілісі болып өтті.
Ақмола облыстық сотының төрағасы Нұрғазы Әбдіқанов ашып, жүргізіп отырған бұл жиынға Астана қаласы, Шығыс Қазақстан, Қарағанды, Қостанай, Павлодар және басқа да облыстардан судьялар мен құқық қорғау саласының өкілдері қатысты. Алдымен, Қазақстан Республикасы Жоғарғы Сотының судьясы Нұржан Қайыпжан баяндама жасап, іс жүзінде кедендік заңдылық қолданылған бірқатар азаматтық істерге тоқталып өтті. Оның айтуынша, соттың қарауына кедендік бақылау органдарынан арыз-талаптар жиі түседі екен. Біреулері шетелден коммерциялық мақсатта әкелінген тауарларға салық төлеуден жалтарып, ісі сотқа кетіп жатса, декларация тапсыру кезінде салықты аз төлеу үшін тауарлардың бағасын әдейі азайтып қоятындар да бар көрінеді. Аталмыш жағдайдың біздің облыста да орын алғаны, салық дауларын сотқа дейінгі реттеуді жетілдіру мақсатында салық апелляциясы жүйесін құру жолымен салық әкімшілігін реформалау қажеттілігі туындап отырғаны да кездесуде айтылды.
Онан әрі сөз алған Ақмола облыстық сотының судьясы Гүлжан Әлмағамбетова кеден заңнамалары ережелерін қолданудың кейбір сұрақтарына, ал, Шығыс Қазақстан облыстық сотының судьясы Альфия Савинова салық органдарының шешіміне шағымдану мәселелеріне тоқталды. Семинар соңында көтерілген барлық мәселелер талқыланып, салық және кедендік заңнамаларды қолдану бойынша ортақ шешім шығарылды.
«Арқа ажарының» өз ақпараты
