Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауын түсіндіру және талқылау мәселелері бойынша Ақмола облыстық сотында өңір судьяларымен кеңес өткізілді.
–Қазақстан Республикасының Президенті өз Жолдауын еліміздің тұрақтылығы мен өркендеуіне арнап отыр,– дей келе, облыстық соттың төрағасы Досжан Әміров Елбасы Нұрсұлтан Әбішұлы Назарбаевтың басшылығымен еліміз әлемдегі беделді әрі орнықты мемлекетке айналғандығын атап көрсетті.
Президент өзінің алғашқы Жолдауында Қазақстанның тұрақтылығы мен одан әрі өркендеуі жайлы айта отырып, 5 бағытты айқындап берді. Олар заман талабына сай тиімді мемлекет, азаматтардың құқықтары мен қауіпсіздігін қамтамасыз ету, қарқынды дамыған және инклюзивті экономика, әлеуметтік жаңғырудың жаңа кезеңі, қуатты өңірлер – қуатты ел.
Жолдаудың негізгі тапсырмалары – бұл халықпен тиімді кері байланыс орнату, митингтер туралы заңнаманы жетілдіру, қоғамдық келісімді нығайту. Азаматтардың құқықтары мен қауіпсіздігін қамтамасыз ету, сот шешімдерінің сапасын арттыру, әкімшілік әділет құрылымын енгізу, дәлелдемелерді жинақтау, азаматтардың мүдделерін ескеру, ауыр қылмыстарға қатысты жазаны күшейту. Оның ішінде, жыныстық зорлық-зомбылық, есірткі, адам саудасы, браконьерлік қылмыстар, сыбайлас жемқорлықпен жан-жақты күрес жүргізу ерекше орын алатыны және осы мәселелер бойынша Мемлекет басшысы Үкіметке тиісті шаралар қабылдауға тапсырма бергені атап көрсетілді.
Облыстық соттың төрағасы судьялар корпусын еліміздің тұрақтылығы мен өркендеуі жолындағы игі іске өз үлестерін қосып, сотта заң үстемдігі мен азаматтардың мүдделерін қорғаудың жоғарғы сапасын қамтамасыз етуге шақырды.
Ақмола облыстық сотының
баспасөз қызметі.
