Целиноград ауданында көктемгі су тасқынының алдын алу шаралары жүргізілуде. Қар тазалау және су сору жұмыстары тәулік бойы тоқтаусыз ұйымдастырылуда.
Соңғы мәліметтер бойынша ауданда 179 текше метр су сорылып, 736 583 текше метр қар тазаланды. Тазаланған қардың көлемі өткен жылмен салыстырғанда 56 000 текше метрге көп. Оның ішінде, Қараөткел ауылында 127 020 текше метр қар шығарылып, аудандық, облыстық және республикалық маңыздағы автокөлік жолдарындағы су өткізетін 160 нысан тазаланды. Бұдан бөлек, елді мекендердегі арықтар мен арналар тазартылып, 20160 метр аумағы кеңейтілді. Оның басым көпшілігі Қоянды ауылына тиесілі. Қараөткел және Талапкер ауылдық округтері аумағында айналма жол көпірінен бастап, Нұресіл ауылына дейінгі Есіл өзенінің арнасы тазартылып, кеңейтілді. Наурыздың 10-ынан 31-і аралығында Нұра және Есіл өзендерінде 3400 шаршы метр аумақта мұз жару жұмыстары жүргізілді.
Қазіргі кезде Целиноград ауданында көктемгі су тасқынының алдын алу жұмыстарына облыстық төтенше жағдай департаментінің жеке құрамынан 198 адам және 84 бірлік арнайы техника, 40 су сорғыш жұмылдырылуда.
Арман НҰРКЕНОВ,
Целиноград аудандық
төтенше жағдай бөлімінің бастығы.
